編輯教落，難得出Trip，唔該搵外國至有特色嘅靚景做Background，咁先可以突出輯相係外地試車。今次西班牙之旅亦唔例外，半日跑勻市區、山村、鄉鎮影相。到中午，駛入大會安排嘅Resort攤唞開餐，飲飽食醉等換其他車款再試過，奈何等了又等只得一句：「等等，未影得住，仲影緊。」唔係嘛？距交車時間得番兩粒鐘，踩番入市區都要一粒鐘，唔通唔停車唔影相咩？
悶悶哋，踩上天台曬日光，嘩，無石屎森林，無灰天黑雲，可以一眼望到幾十里遠景，空氣清新，吸啖氣都舒服過人，絕對係心曠神怡。咦？原來仲有個靚到不得了嘅大湖㖭，怪不得要我等了又等，全因幾部車俾人揸咗去湖畔取景。唔係外國月亮特別圓，但不得不讚外國風景特別好，好多靚景都可以揸車直達；睇番香港？優美景色已經少，可以揸車直達嘅就更加寥寥無幾，難怪行家們一見迷人風景，就影相影到無晒時間觀念，要我久等啦。
（四之二）
記者：梁美甜