美股呢輪大上大落，周二更大升300多點，但港股就因「北冕」而停市，好友當堂窒住道中氣，至於牛熊證，停市對炒家可能係福，亦可能係禍，真係各安天命。
首長國際（697）2.50元果然守唔住，要跌番轉，周二最低質到落2.27元，但強勢股即係強勢股，尾市有強力反彈，可以掃返上2.41元收市，在大跌市中有咁嘅表現，揸家真係飲得杯落。
事實上，5月7日恒指高見26378之時，首國係2.59元，之後曾升上2.87元，本周二恒指收21949，同高位比較，下跌16.8%，而首國收2.41元，同2.59元比較，只下跌6.95%，強勢畢呈。
鋼鐵價格近期雖回落，但首國主力生產高附加值寬厚鋼板，在內地市場長期供不應求，應不受大圍跌價影響，保守估計08年（12月年結）每股盈利0.35元，升60%，以PE10倍計，今年底目標價係3.50元，首國每次調整，都係低吸機會，能在2.30元以下吸入，可賺5成。
短期目標6.60元
內銀股亦係大強勢，周二大跌市中，建設銀行（939）跌到6.57元後，出現強力反彈，市後交易時段的U盤更高收6.73元，全日僅跌7仙，跌幅只1%，只要時勢一就，隨時可破位而上。其實，建行同5月7日最高價比較，跌咗7.2%，遠比期內恒指的16.8%跌幅為小，個勢咁強，相信好快可升破7元阻力，向短期目標8元推進。
另一隻可兼選嘅內銀股係工商銀行（1398），同建行一樣，工行在過去3個月嘅跌幅只係6.8%，而前日由低位5.64元亦反彈上5.74元收市，只係跌7仙，跌幅1.2%，目前走勢在5.56元至6元間形成上升三角形，升破5.90元阻力，短期目標指向6.60元。
工行係第一間發出「盈喜」嘅內銀，以佢嘅50%增長計，08年（12月年結）上半年淨利潤應有612億元人民幣（下同），但應不只此數，全年盈利估計可達1280億元，每股盈利0.43港元，以預測PE15倍計，股價可見6.45元。
大行多看好內銀股前景，工行係熱選對象，中期目標由6.78至7.20元，平均計有逾20%的上升空間，頗吸引。