新紮女局長認為「逢商必奸」，不過唔係個個官員都咁盟塞嘅，至少退休高官梁展文唔係咁諗，唔止官商合作好和諧，甚至親身下海搵真銀，過過「冷河」就加入新世界，有人話彤叔今次深慶得人，不過市民卻好㷫呢個人，事關梁展文退休前被指賤賣紅灣半島畀地產商，轉個頭就幫大孖沙打工，難怪全民皆㷫，煲呔見勢色唔對，前晚身處廣州都發出聲明，要求公務員事務局調查解釋。
出手免民望受累
煲呔忽然出手，明顯係試圖補鑊避免民望受累，犧牲梁展文濕濕碎，甚至要公務員事務局局長俞宗怡揹鑊都在所不惜，不過官場同政壇人士卻唔係咁諗，質疑煲呔忽然包青天上身扮公正，又係玩親疏有別，有口話人冇口話自己！遠嘅唔使提，近日前政務司司長許仕仁肥龍披露同紅色商人李大壯開公司，煲呔被指唔守規矩隨便開綠燈，呢件事睇落都好有問題喎，點解煲呔又唔向市民清楚解釋呢？
肥龍係政協常委，又係煲呔好兄弟，在公在私，梁展文身為打工仔（應該係年薪幾百萬打工皇帝）都冇得同佢比，八方唔知煲呔對被指包庇親信有乜感受，但肯定市民對官商勾結、利益輸送十分反感，如果真係只許肥龍開公司，卻不許梁展文打工嘅話，煲呔又點解畫呢？煲呔日前突然表心迹，話希望四年後退休，去學習希伯來文同帶孫女遊埠嘆世界，聽佢咁講，佢做完呢份工，應該唔會再做下一份工，只怕其他高官唔係咁諗啫。
事實上退休官員從商唔罕有，根據港府資料，平均每年有幾十個退休官員申請投身商界，有關方面跟足最高領導人指示，對申請通情達理，被否決嘅絕無僅有，可以話係來者不拒㖭，難怪令人覺得所謂審批機制有名無實。今次梁展文事件，當局可以辯稱係個別事件，只怕日後源源不絕陸續有來，整個制度淪為橡皮圖章，對已退休、又想嘗試喺商界創一番事業嘅固然唔公平，對現職公務員亦唔係好事，事關一而再、再而三發生呢啲事件，市民難免會質疑官員處事為公，定係想為自己日後搵份好工呀？
mailto:[email protected]