嘩，真係贏到你唔信，熱刺前日以3:0大炒多蒙特，捧走飛燕諾四角賽錦標，取得季前賽4連勝，「友賽之王」非佢莫屬，照咁睇今季有得發圍……。咪住，類似嘅說話係咪好熟？原來對上兩季我求大俠都講過熱刺季前好勁，但結果都係虛火，唔知今季……。
賣走羅比堅尼、羅賓遜、占邦達等人，換嚟成棚新人，而射手貝碧托夫一副懶懶閒態度，冇問題，熱刺前日以3:0大炒多蒙特，到目前為止季前賽踢7場6勝1和攻入28球。咁掂，唔怪得中場贊拿斯相信隊波今季可以衝擊前4：「想入前4踢歐聯唔容易，但以我哋咁嘅人腳真係有機會。」
開鑼即輸有前科
講到勁，查實對上兩季熱刺季前賽嘅成績仲勁，前季7勝1和，結果英超開鑼作客強勢襲保頓，輸0:2；上季仲癲，季前7戰全勝，但去到英超開鑼又點？唔好意思，作客新特蘭輸0:1，唔知今季首場作客米杜士堡，會唔會又係出現低開嘅情況？
我求大俠唔敢斷言，到底熱刺今季嘅季前強勢係咪又屬假象，但可以肯定嘅係，之前對手實力有限，你話些路廸、多蒙特勁咩，有睇波就知佢哋完全唔係嗰皮，踢嚟得啖笑。至於成為季前「入波機器」嘅戴倫賓特，平時踢英超邊有咁勁揪？
仲有個以高姿態加盟嘅克羅地亞中場莫廸歷，以前有唔少受傷嘅紀錄，嚟到埋身肉搏嘅英超都咪話唔牙煙。講到尾，季初想捧熱刺都係睇定啲先，癡心錯付被「刺」親就唔好啦。
熱刺季前龍咁威實錄
勝泰維尼斯8:0
勝丹尼亞4:2
和靴古里斯1:1
勝諾域治5:1
勝奧連特5:1
勝些路廸2:0
勝多蒙特3:0
總計：6勝1和