美國私募基金黑石（Blackstone）前日宣佈喺北京正式設立辦事處，據《每日經濟新聞》報道，佢哋請咗國家發改委外資司綜合處前處長付山揸旗，做駐京首席代表。睇嚟黑石都好鍾意招攬前高官，好似佢哋嘅大中華區主席，就搵咗特區前財爺梁錦松擔任，唔通黑石諗住佢哋有政府背景，曾經喺朝中辦過事，第日有刁嘅話，同政府傾都會容易啲？
付山喺北京大學畢業，佢讀嘅科目同經濟冇乜關係，主修歷史學，攞到學士同碩士學位。之前，付山曾經喺國家發改委、國家經貿委員會、國務院經貿辦同國務院生產辦等部委任職，擁有豐富嘅政府經驗。離開咗官場後，付山曾經短暫加盟內地上市嘅北京綿世投資，做過副總裁。
順帶一提，中投上年用咗30億美金（234億港元）入股黑石，無奈股市唔就，投資蝕逾四成。