唔係個個識炒股，就算識都未必有時間成日昅實個市。北京就有對父子，出錢搵人幫佢哋手炒股。點知受聘嘅贏咗錢，對父子居然唔認數，幫人炒股嗰個梗唔會就咁算數，於是鬧上法庭，結果係點？
據《新華網》報道，北京有對姓趙嘅父子，前年搵咗位姓呂嘅散戶幫佢哋炒股，雙方仲簽咗合同，趙氏父子存200萬人仔落自己嘅股票戶口，然後就授權畀姓呂嘅用個戶口嚟炒股，為咗保障自己，趙氏父子要呂生存100萬入個股票戶口度做保證金。一年之後，呂生無論贏輸，只需要畀222萬人仔趙氏父子，其他贏到嘅全部可以自己袋。
呂散戶不負所託，一年之後，股票戶口由300萬變咗688萬，點知趙氏父子過橋抽板，換咗個戶口密碼，咁你係阿呂生都唔會罷休啦，搞到法庭相見。喺庭上，趙老先生居然話唔識姓呂嘅，之但係白紙黑字有晒合約，結果趙氏父子輸官司，要畀351萬銀人仔兼利息。