「玩股票等同吸煙」？香港討論區網友Leewaiyeung話：「炒股上咗癮就好難戒。」唔少網友深有同感，疑似輸神話：「一隻會搞到肺癌，一隻會搞到荷包亁硬化，都係絕症。」elaine20326唱和：「兩樣都係慢性自殺。」ykho3388搭嘴：「呢兩味嘢都陪咗我好多年，缺一不可。」
hyper1呻：「我仲慘，買牛熊證上咗癮。」點解？買股票輸咗都仲有渣拿，但買咗N類牛熊證，俾人打靶咗就乜都冇；R類牛熊證都仲好啲，收番些少錢。
想戒甩股票癮唔係冇計嘅，想入菲菲提議：「只要發咗達，咁咪唔會再玩股票囉。」不過呢個唔係解決方法，係每個散戶嘅終極目標，唔好本末倒置。