一提川菜，腦中立刻浮出一個畫面，眼中盡見整碟的紅澄澄辣油，呼吸的是陣陣刺鼻辣味，吃時嘴裏幾乎噴火，幾乎要一啖冰水送一啖菜，這就是我對川菜的印象。一般人食川菜講求麻辣，原來今時今日食麻辣係未夠，新開張的渝川Sell的卻是「嫲辣」，事關這種以香為主的辣油，原來真傳自店主黃先生在四川的嫲嫲！
記者：王震遠
攝影：王文忠
阿嫲秘製配方
「嫲辣」香料，唔係錯別字。新開張「渝川菜館」的川菜強調正宗，吃起來零舍不同，全靠嫲嫲秘製香料，其秘製辣油，麻而不算太辣，卻比一般川菜帶有一種與別不同的強烈香味，令入口感覺更立體，完全刺激每個味蕾。原來這辣油配方，是由身在四川的嫲嫲發明的。由於嫲嫲本身喜歡下廚，屋企附近有間餐館，她就經常到餐館研究煮食心得，經過不斷嘗試，終於調配成這條秘方。店主黃先生說，部份配料來自四川，用上超過廿種配料，比起平常只用幾款配料做成的香料，嫲辣香料的香味更層次廣闊，香味更濃郁。
要試真這種嫲辣，首選必定係來鳳魚。來鳳魚這菜式源自來鳳鎮，十數年前有兩夫妻無意間試出煮法，其後更聞名於世，是四川名菜之一，但奇怪是在香港能嚐到的地方不多。此魚在烹調過程中，比起一般菜式運用更多花椒粉，所以入口唔算太辣，但感覺充滿麻味，漸漸擴散口腔每一個位置，而魚腩肉質夠鮮夠嫩，令人齒頰留香，回味無窮。
負責人May
我嫲嫲做正宗四川菜，唔會為遷就香港人口味改變味道，有時有客上來食唔到咁辣，搞到我都好頭痛。
來鳳魚（熱菜）
選用鯇魚魚腩，先用薑、二鍋頭、大葱同鹽醃半個鐘，煮之前會放油、薑、青花椒同辣椒亁落鑊炒香。再放魚落鑊開火煮五分鐘，等條魚入味，再加大量花椒粉堆埋條魚，再灒滾油上面，就可以上碟。入口唔算太辣但麻味十足，聞得到香辣味撲鼻，魚腩夠咬感，肉質彈牙味道好鮮。
沸騰水煮魚（熱菜）
鯇魚切片，放少少生粉同油醃到入味，再用糍巴辣椒、紅花椒同辣椒亁浸一晚，準備工夫做到足。煮嘅時候放鹽、豆瓣醬、薑同蒜頭炒香，炒到適當時候，放師傅親手熬嘅豬骨湯落鑊一齊煮。灒油可以保持魚嘅溫度，保持鮮味，一啲都唔腥。食得出魚肉好滑，辣味適中。
川式椒鹽蝦（熱菜）
新鮮基圍蝦剪頭開邊，炸到脆身後，再加秘製調味料加葱用慢火炒香，變金黃色就可以上碟！開邊炸令到蝦肉更入味，亁身得嚟鎖得住鮮味。
重慶辣子雞（熱菜）
選用新鮮雞髀拆肉，用薑汁、大葱、胡椒粉、少少二鍋頭，落少少頭抽，醃兩個鐘就好入味。醃好炸完炒到亁身。入口好香，肉質亁身幾有咬口！
四川凉麵（凉菜）
條條凉麵由人手打造，預先煮好打散，再用筷子不斷攪，用天然風冷卻但唔吹亁，保持濕度。配用醋、豉油、花椒油、麻油煮成嘅醬汁上碟。凉麵人手製零舍煙韌，紅油嗰種麻味真係齒頰留香，汁辣麵凉食到層次分明，入口撈埋嗰種感覺好特別。
食客有Say：
陳小姐：「好新鮮，好道地，外面川菜無咁正統，辣嘅辣，麻嘅麻。」
楊太：「我覺得呢度菜式好正宗，蝦蟹都好新鮮，好彈牙。」
渝川菜館（28385233）
灣仔駱克道354號國樑樓2樓