衫字經：新丁報到！老美Rapper戰衣

香港眼見的板牌數埋一大籮，但登得上大雅之堂的就無幾何。大部份都要去樓上水貨舖捐窿捐罅先搵到，唯獨係佢──Kallusive，初來甫到香港，即被潮店大哥D-mop睇中，收歸旗下J-01獨家發售。有幾勁？出道兩年已成為美國Rap場的Rapper戰衣，板仔、DJ的「指定制服」。今季殺到埋身，頂得順無？

記者：葉雪芯　
攝影：譚盈傑　
Model：Myles.P@Modelmanagement　
Makeup：Sammy

解讀：Kallusive＝啓發

Kallusive在2006年9月於美國成立，唔夠兩年經已在板仔界中打響名堂。經常在大小rap場中見到rapper身穿Kallusive招牌潑油Oversizetee，近年美國DJ界當紅的DJGata和DJMikeSong都係忠實擁躉，幾乎成為兩位大人物的指定服裝。
Kallusive的設計與一般的板tee有些少不同，色彩極多，大部份加入非常有街頭味道的噴墨、油漆、水滴等graffiti元素，在美國的板仔界被譽為是「着得上身的藝術」。唔好以為板仔淨係周街遊蕩踩板乜都唔關心，Kallusive的設計靈感由天文地理到政治時事都包括在內，所有的設計都由Kallusive的CEOAlexCotraviwat親自操刀，多以諷刺美國近年的社會、政治時弊等為主，一睇即知你企咩立場、想講咩message。Kallusive的意思係啓發，每件tee的前後幅都有Slogan，希望透過年輕人着重的Fashion來啓發人心，每件tee前後兩面圖案均有不同，意思係想帶出凡事有兩面睇的意義。

■DJGata

■DJMikeSong

■KallusiveReflection白色金油漆短袖tee，前後兩幅圖案不同，前面是完好無缺的鏡，後面是碎裂的鏡，寓意是凡事兩面睇，有好有壞。$320（j)

玩盡血腥美學

Kallusive今季口號「LeaveYourMark」，意思是認定真我，除了有招牌貨oversizetee之外，仲推出了厚身衞衣。圖案以近年美國人極關心的戰爭問題做主題，例如有代表兇惡不講道理的大猩猩襲地球來諷刺美國近年好戰的一面，亦有聖母像配身後的機關槍來表達「表面仁慈背後殘暴」的意思，非常大膽，擺明話你知，我有我態度，唔怪得班美國rapper板仔咁buy佢哋呢套血腥美學！暫時在港發售的只有男裝，但今個冬季將正式推出女裝，到時香港方面亦會入貨，唔止𠱁得掂板仔，板女市場都一於全面進攻！