轆Book：馬術選手專車夠豪

嚟自世界各地嘅奧運馬術選手相繼抵達香港，而接載呢班上賓嘅就係大會指定嘅Audi車，要數最豪最嘆就一定係旗艦長陣版嘅A8L喇，新車豪華度猶如路上宮殿，呢班馬術選手一身便裝兼有人服侍，輕鬆嘆住去場地，馬到功成有幾難！

記者：梁美甜
攝影：陳盛臣
模特兒：Brad（TheGroup）

60萬選配豪嘆

今日呢部A8L唔係新車型，但就係自04年以嚟首次Facelifte版，拍攝當日嘅新車更加入最新Option項目嘅Exclusive裝備，令本身已經係夠頂級豪華舒適嘅高級轎車更提升一級，豪上豪。
Exclusive最巴閉之一絕對係嗰個全球首創嘅指模防盜系統，印一印指模就從MMI儲存系統入面抽番個人紀錄，好似冷、暖氣溫度，軚環位置、收音機台等，體貼又舒服，直情好似有個電腦丫鬟貼身服侍一樣。
連同其他Exclusive裝備，單係是次拍攝A8L嘅呢套Option就盛惠60萬。內涵包括雙色真皮用料座椅以及內飾，就算縫線都係專用色料；長陣軸距有成3,074mm，後座空間大到暈，12向調校真皮駕駛座、4Zone獨立恒溫冷氣、後排獨立調校電動椅兼附按摩功能、MMI多媒體系統、小型雪櫃連專用水晶杯、Bang&Olufsen高級音響連14個揚聲器等。
後排揚聲器仲可以作有限度伸展，最搞鬼嘅係當開咗音響系統之後，兩個揚聲器會自動由儀錶板伸出嚟；天氣熱都好，A8L嘅隔音隔熱防曬功效都唔錯，外面攝氏30幾度，內櫳開咗冷氣關晒窗落埋太陽檔之後，居然好似廣告咁又靜又舒爽，開埋按摩椅就更加不得了，唔知班選手同各國貴賓會唔會嘆到唔捨得落車呢？

■於後排手枕位嘅專用水晶杯，係身份象徵。

■四張電動皮椅都可獨立調校，駕駛座更擁有12向多個調校角度。

■附有照明功能嘅伸縮式化妝鏡，啱晒講求儀表嘅人。

■全球首創嘅指模防盜系統，體貼安全又搞鬼。

■前排獨立手枕連後排獨立恒溫出風口，豪華中見細緻。

■用上鋁合金、桃木、真皮作內飾，豪華而舒適。

■香港地圖就算用中文都一樣得。

■儀錶板設計簡單，資料清晰又齊全。

長得靈敏好反應

大家千祈咪俾佢長陣外形呃倒，以為部車好鬼重，Sorry，新車早就用AudiSpaceFrameII，即鋁合金作為全車車架，就算連埋副偈同quattro都比S500同750Li少100kg左右，輕咗自不然慳番啲油，剛性高亦有助提升操控性同埋安全性。
A8L副4.2公升引擎搭配Audi出色嘅四驅quatrro系統，加埋19吋P-ZeroRosso輪胎，令257匹馬力同強勁扭力喺路面表現非常揮灑自如。坐到駕駛座揸住佢出街之後，A8L嘅靈敏反應同性能完全令我誤以為揸緊部爽爆房車，唯一棘手嘅係入泊室內停車場時要格外小心囉！

■19吋輪胎襯得起A8L，亦輔助行車穩定性及轉向循迹性。

■新車外形變動少，頭燈更與之前相若。

■尾箱容積大，足以負載選手同貴賓嘅隨身行李。

AudiA8L4.2FSIquattro規格

引擎：4,163c.c.V8
馬力：257bhp/6,800rpm
扭力：440Nm/3,500rpm
傳動：六前速+/-自動波，前置，四輪驅動
0-100km/h：6.3秒

查詢：合廸汽車（25281862）