奧運開幕在即，香港奧運馬術賽入場門券幾已沽售一空，有同學來電要求左丁山代為撲飛，真係多謝佢哋睇得起，自己邊度有飛呀，一啲主要贊助商就有，得到佢哋邀請就唔使買飛入場。入場觀眾有唔少限制，全部係國際奧委會與國際馬聯與北京奧組委規定嘅，香港特區政府唔係主辦單位，奧運馬術公司係執行機構，一切要依國際與國家規定辦事。因奧馬術賽平時在港並不流行，入場觀眾最好帶備FM收音機，用耳筒收聽現場評述，萬勿喧嘩。
京奧話要按中國傳統吉利文化，在○八年八月八日八時零八分開幕。翻查《通勝》，八月八日係庚辰日，成日，係好日嚟嘅，宜祭祀、祈福、訂婚、納采、醫病、開市等等，確係幾好，偏偏下午七至九點鐘戌時係凶時，唔係幾盞，未得十全十美。
參加奧運體育項目者，絕大部份係平民子弟。皇室貴族邊度有打籃球、跑一百米或者游泳㗎。馬術賽就唔同，貴介公子與王子公主喜馬球、馬術，故此來港參加奧運馬術賽選手之中，不乏皇室人員，英女皇外孫女因愛駒受傷，退出比賽，引為憾事，馬術高手安妮公主仍然來港觀賽兼為英國隊打氣，外交界消息話阿拉伯皇子來港親征，沙地總領事已着緊晒，丹麥方面又話有貴人到港，總之奧運馬術期間，不少「貴氣」在沙田及雙魚河浮現。因保護皇室人員比保護奧運村更加嚴格，警方人員更加忙碌。
馬主N與幾位傳媒朋友茶聚，大家當問賽馬貼士咁追問佢邊路人馬有資格攞金銀銅牌，有如賽馬分獨贏（金牌）、亞、季軍咁樣。馬主N話：「你估評馬可以分正副冷選咩，冇咁易，以事論事，上季荷蘭選手輕取盛裝舞步金牌，姿態無敵，今次捲土重來，應該係金牌大熱門，其他就難講，我現在刨緊各位選手嘅賽績以及配馬嘅血統賽績，刨得多，應該可以睇到多少。香港與中國選手及配馬限於經驗，能衝出第一圈，已經值得我哋拍掌，能拿獎牌，當然喜出望外。」