公民黨噚日搞咗個別出心裁嘅政綱發佈會，搵嚟一班好得意嘅細路仔，以短劇方式，帶出唔同候選人嘅政綱重點，睇得一眾黨友同傳媒行家笑唔停口。喺大學教開書嘅黨主席關信基教授，噚日就引中國古籍，講出「公道」為何物，又同黨內一眾候選人講，𠵱家仲未係最辛苦，最辛苦其實係當選後，要對選民有好重嘅承擔。
「道」字似懷舊帆船
近日頻頻揮動毛筆，為黨友打氣嘅公民黨黨魁余若薇，噚日講起「公道」呢個字時，聲調就有啲激動。佢話當初黨友叫佢用毛筆寫「公道」兩個字時，自己都唔知道有乜用途，原來黨友好有心思，將呢兩個字key落一幅以香港做背景嘅構圖上面。余若薇之後先發覺自己寫個「道」字，同背景幅圖好有化學作用，似足一艘香港舊時嘅帆船。
余若薇嘅兩個拍檔陳淑莊同容詠嫦，因為近排要忙落區，結果一個搞到曬到額頭黑晒，一個就瘦咗成個碼。八方會後見陳淑莊喺手袋攞嘢出嚟食，同佢傾開，先知佢忙到連飯都冇時間食，結果成日要捱麵包，爭民主爭選票，有時都真係少啲耐力都唔得。