來到泰國喀比最南的KohLanta，不要期望像布吉一樣夜夜笙歌狂飲爛醉。想當日我不過隨口問吓附近有無夜市啫，已被當地人無情一睥，「喀比，係嚟感受大．自．然㗎！」喀比的魅力在日間也在林間，環島橡膠樹釋放原始熱情森林氣息，這裏沒有人妖花姿繚繞，但象仔長鼻鼻更加熱情可人，碰到遊客仲會大跳ChaCha！
記者：劉嘉蕙
攝影：陳陶鈞
鳴謝：泰國旅遊局
戙腳坐爛板船
避世最好去喀比KohLanta，因為夠隔涉。喀比KohLanta由兩個小島KohLantaNoi及KohLantaYai組成，前者純粹民居，後者則是泰國近年新興旅遊勝地，以北歐客為主。遊客到達喀比機場要坐約1個小時車到碼頭，再連人帶車轉兩次船，第一站停LantaNoi，上岸又搭15分鐘車去另一碼頭駁船過LantaYai。而船，是「連人帶車船」，船身簡陋，無遮無擋得塊爛甲板，與一眾勞動味重的當地人齊齊戙高腳看海，甚有黑社會電影中二五仔着草feel。
許多人到喀比攀石和潛水，此行天氣麻麻，我選保守的PlanC──島上生態遊。因曼谷和布吉的過度興旺，令人忘記還有一大片未經修飾的熱帶森林。在KohLanta，周圍可看到橡膠樹林，一棟棟像塗滿白色塗改液的朱古力。「KohLanta七成面積種滿橡膠樹，工人在樹幹放個兜，收集到一定份量的橡膠就拿去加工……」當地導遊以九牛二虎之力用英文講解，我也回敬九牛二虎之力去聽，但只聽到咁多咋！
大象跳ChaCha
行程二，導遊安排較有動感的山洞探險及騎大象，二揀一。我着了凉鞋，攝影師一身器材，雙雙被勸導參加冇咁危險的騎大象。去到停象場，門口的小象居然naturalhigh，腳上扣住鎖鏈，但仍宛若無事的行來行去，很有節奏感。我看了3分鐘，終於看懂佢應該係跳緊ChaCha！舞動奇象！平常動物園的象，不是企喺度發呆唔多郁嗎？面對這隻dancingelephant，實在無法不令人第一時間請佢食蕉以作獎勵。想不到小象不只步法一流，接蕉亦很有一手，一面食蕉，臉上還露出廸士尼小飛象式笑容，識笑嘅象？好詭異呀！
騎象遊，是KohLanta其中一項王牌節目，這場象，要騎足一個鐘。在象伕的帶領下，我們走入森林，上坡下坡，同時見證動物滋養森林的重要儀式──大象便便，像椰子，新鮮熱辣，但唔臭。
咪當我水魚
04年南亞海嘯，喀比也被波及，這次遊KohLanta，看到沿岸一列新房屋，都是災後重新振作的成果，一些resort也正在裝修建池，準備迎接下個旺季的客人。KohLantaYai另一邊的紅樹林，就安靜得恍如沒有旁觀過任何災禍。小艇在水上快速移動，偶然經過幾間漂流小屋，供遊客租借搞BBQparty。遊紅樹林的目的，原來是：船伕指住前方有幾個小島問，「想去嗎？」「想。」「我無油嘞，畀多少少錢我就駛過去。」在水中央，你真係當我水魚？終於全船6人和議歸隊。
SangKhaOuResort&Spa
地址：86Moo7,SangKhaOu,KohLanta,Krabi,Thailand
電話：（66）86-959-6879
網址： http://www.sangkhaouresort.com
嘆Spa睇戲好梳乎
KohLanta有很多BeachResort，而LanghamPlaceEcoResort&Spa是島上唯一國際五星級Resort，它前身是五星RawiwarinResort，朗豪酒店購入後將設施略作調整，再引入川Spa。川Spa以五行為主題，技師會根據客人的五行屬性調配適當療程。招牌全包宴ChuanSerenityShen包石頭按摩、水療、香氛facial等，3小時收費約$1,212。攝影師哥哥只幫襯$385基本套餐，半粒鐘就瞓着了。
Resort仲設多項娛樂設施，最特別係迷你戲院及音樂室。300呎戲院每日公映兩場，戲碼先到先揀，凳、爆穀、音響都同一般戲院無異；音樂室則採用真空管擴音器，就連高級Villa房內亦設有同類擴音器，正！
LanghamPlaceEcoResort&Spa
地址：139Moo8,KohLanta,Krabi,Thailand
網址： http://krabi.langhamplacehotels.com
出門提一提
簽證：持BNO或特區護照均毋須簽證。查詢：25216481（泰國領事館）
機票：乘泰國航空由香港至喀比，來回機票價$6,410起。查詢：21797790（泰國航空）
套票：喀比藍塔島KohLanta三日兩夜自由行套票$2,999起，包來回機票（曼谷機場轉機），兩晚住宿LanghamPlaceEcoResort&Spa，有效期至10月31日。查詢：24992278（安運旅遊）
貨幣：1港元約兌4.29泰銖（文中價錢已折算港元）
電壓：220V，兩腳扁插頭
下周泰國喀比天晴25-32℃
