特區政府派糖，本意在利民紓困，但又為咗擴大受惠層面，益吓中產，於是加入一樣「暫停外傭稅」，點知因為落實麻煩，令到好多人覺得不公，嗌嘈晒，反令曾特首、張建宗（勞工及福利局局長）民望下跌。早知如此，外傭稅照舊，對政府反而仲好。
外傭稅每月四百元，由僱主付出，實際上係二○○三年失業率高企之時，政務司司長曾陰權推出嘅，目的係將呢筆款項畀再培訓局，開辦培訓本地工人轉型嘅課程。四百元出自羊身上，即是削減外傭月薪四百元，僱主嘅每月支出並無增加。左丁山係中產階級，一九八二年開始請菲傭，○二年菲傭退休，月薪由一千三百元加到三八六○元，再減到三六七○元，依足政府規定。○五年再請菲傭，月薪三千三百二十元，外傭稅四百元，同以前比較，支出無甚分別。
好嘞，五年來再培訓局嘅外傭稅收入連投資收益，減除支出後，滾存近四十五億元，連再培訓局主席田北辰都覺得收埋咁多錢，有啲唔好意思，認為可以考慮唔收外傭稅。事實上，本港失業率已持續下跌到3.4%左右，屬於充份就業情況，再培訓局以後嘅支出可以減少啲，倚靠投資收益已可維持營運，無謂要外傭繼續津貼再培訓工作吖。
左丁山完全支持撤銷外傭稅，並同時加番外傭人工至三千八百六十元，即使係咁，此月薪仍然係一九九八年嘅水平，十年來累積通脹加埋港元貶值已經令外傭月薪失去唔少購買力。
既然請得起外傭，就無謂斤斤計較可唔可以免繳兩年共九千六百元嘅稅款啦，但人人都有自己一個算盤，有人要計較，亦意料中事，何解曾特首與張建宗事前完全冇諗到在落實階段嘅複雜情況呀？實在令人費解，可能係以為派糖等於萬靈丹，僱主只會歡呼，不會反對之故。現在搞成咁，正是為香港添煩添亂，中央看在眼裏，少不免又為曾特首記上一隻黑豬仔。早知就唔暫停外傭稅好過。