只要係「潮」，通常都會有市場。噚日民建聯搞造勢大會都追上「潮」流，唔少候選團隊都以「潮」出位。當中最特別係曾鈺成嘅港島團隊，事關阿曾等人年紀唔小，但都戴住cap帽着住短褲以板仔look現身，仲郁身郁勢唱rap歌，真係估佢唔到。阿曾完場後仲問人佢唱得好唔好，睇嚟都好緊張呢個新形象，稍後佢話要練好首歌，希望拍條短片放喺YouTube喎。
劉江華領軍嘅新東團隊都唔執輸，猛用潮語話佢哋唔會龜縮同淆底，而且唔會hea吓hea吓令大家O晒嘴，聽到台下嘅觀眾都笑到碌地。主席譚耀宗領軍嘅新西團隊就扮西部牛仔，追殺打擊通脹不力嘅煲呔曾。