見慣大場面嘅日本天后倖田來未，前日着住件好性感嘅大露背長裙現身橫濱球場，喺大批觀眾面前獻唱日本國歌，為即將開始嘅職業棒球明星賽打氣。佢出場時拍晒心口定驚，話自己係第一次單獨現場唱國歌，所以由綵排嗰一刻開始已經好緊張，不過又覺得係好寶貴嘅經驗。性感女星小倉優子亦都喺中場時出場高歌，不過打扮密實嘅佢卻自稱五音不全。