大K郭炳湘自傳出三兄弟不和後，辭去新地主席及行政總裁職務，無工一身輕，大K呢幾個月成日周圍去，上月底仲喺英國接受《金融時報》訪問，大爆自己97年被大賊張子強綁架勒索，曾經患抑鬱症，但大約一年後已經康復。鮮有露面嘅郭老太同太太Wendy，仲出席咗由郭氏基金冠名贊助嘅中央芭蕾舞團表演，大K精神奕奕，兩公婆仲滿場飛，周圍同嘉賓握手傾偈，睇嚟佢真係完全康復。
講番個中央芭蕾舞團，國內同國際知名度頗高，成日周遊列國演出，兼夾賣個滿堂紅。舞蹈團上星期四，喺被譽為世界頂級芭蕾劇場之一嘅倫敦皇家歌劇院演出著名劇目《天鵝湖》。除咗大K伉儷，前港督衞奕信、前布政司霍德都係座上客，都咪話唔巴閉。