正所謂好嘅開始係成功嘅一半，波爾多上周六晚喺法國超級盃，互射12碼擊敗里昂，打斷里昂連續7次捧盃美夢，唔通意味里昂王朝今季都俾波爾多打斷埋？
法國超級盃形式同英格蘭社區盾相似，由上季聯賽同足總盃冠軍交手，不過因為里昂上季包辦法甲同法足盃冠軍，就搵聯賽「2哥」波爾多做對手；同社區盾唔同，賽事唔喺中立場舉行，反而抽籤決定邊隊主場，波爾多好彩可以主場。
波爾多射贏12碼
講真呢個法超盃，同聯賽7連冠嘅里昂好有緣，近6屆都係里昂捧盃；不過今仗打落一啲都唔對辦，新教練佩爾派咗門將洛里斯、中場桑馬干等新兵，同賓施馬、高禾呢啲主力上陣。不過如果唔係洛里斯力挽狂瀾，法定時間已經輸波。雙方法定時間踢成0:0，要互射12碼分勝負；結果里昂巴西中堅克里斯宴客，波爾多終贏5:4。幫波爾多捧盃嘅教練唔係陌生人，佢就係前法國同曼聯中堅白蘭斯。
里昂呢幾季都高價放走主力，引入廉價兵。又要馬兒好，又要馬兒不吃草，希望咁樣都可以保住法甲王者地位；但競爭對手波爾多同馬賽等都積極擴軍，里昂今季未必再咁穩陣；曾經得到曼聯垂青嘅上季神射手賓施馬，唔知有冇後悔留隊呢個決定呢？
足智彩開出新一季法甲冠軍賠率，里昂只得1.35倍，我求大俠就覺得熱得唔值博；花無百日紅，法甲冠軍係時候等其他球隊捧吓啦。