星期日係候選人拉票大好日子，白鴿黨主席何俊仁自然唔會放過大好時機，噚日同參選團隊喺扎根嘅屯門拉票。今次仁哥嘅拉票方式都好特別，簡直好似個遊樂團咁，佢哋先喺屯門兆麟踩單車出發，去到友愛就停低，不過佢哋唔單止落地行吓路叫吓口號就算，而係邊行邊唱歌、搖鼓甚至耍太極。
點解行行吓要耍太極咁搞笑？原來仁哥係想借此表達市民需要好多公共空間，進行文娛康體活動，耍太極就係一般市民最常做嘅活動。講完唔做又好似係差啲說服力，所以仁哥都即時耍番兩手，據現場人士話佢身形肥肥哋但夠紮實，耍起太極上嚟都有姿勢又有實際，同啲老手相比一啲都唔輸蝕。