睇得見的音樂 登登燈凳

睇得見的音樂 登登燈凳

音樂與家品,大纜都扯唔埋。可法國新晉設計師LavransLaading竟將貝多芬《命運交響曲》的登登登凳,幻化成聲紋並套落家具中,將歐美最潮的音樂雕塑與家具相結合,成為全球首創的音樂家品。即係乜?咪係創新家具囉!

記者:區佩嫦
攝影:伍慶泉

音樂雕塑 形態家品

近年歐美流行起音樂雕塑(MusicSculpture),即以音樂特有的「聲紋」作雕塑,抽象居多,供觀賞欠實用,Lavrans是首位破格設計師,將之套於家品中。「音樂由不同聲調、旋律等結合,除用音符表達外,亦可將之變成高低有致的形態,即聲紋(SoundWave),簡單講係似心電圖或HiFi的Equalizer。而我則將聲紋形態變成實物的音樂雕塑家品。」嗯,頭上問號漸少……

■這張椅便是Lavrans贏Comite-Colbert/LouisVuitton(2003)的得獎作。

整家品睇餸食飯

「設計時要先找合適聲紋,聽旋律來做?No!我只會看聲紋形態靚唔靚,要我講茶几是跟那節樂曲,邊個係登登登凳經典旋律,Sorry!」Lavrans即時打開Laptop,為我找出喇叭的聲紋,的確形神俱似!
搵到靚紋無用,還須付諸實行,先將家品的Size縮細符合香港蚊型家居,又因唔想價錢太貴用木棄膠,以人手逐Part刨。「一個膠模動輒幾十萬;布較軟身難做出靚形狀;木夠平噴白色Polyurethane,效果似膠咁靚。」單是對喇叭便失敗了N次花足一個月,刨木時更險被斷開木條打中臉,幸好閃得快,保住塊靚面!又睇價錢又因應香港需要,Lavrans好似實際咗啲,「我係Designer而非Artist,無人買的作品係無用。」明白!

■Lavrans覺得這段聲紋Fit晒喇叭的外形,又真係幾似。

茶几$12,000

圓弧形的玻璃茶几架,實木面噴上了Polyurethane漆油,這層油有塑膠手感,可令木更硬淨耐用。
(100×70×38cm)

層架$12,000

Lavrans巧妙地將層架以3隻聲紋腳作支撐,打造跌宕有致的層板設計。
(120×200cm)

燈罩未定價

原個玻璃吹製而成的天花吊燈,Lavrans利用燈罩上的3條白色漆油,將小燈膽的有限燈光作出多方位的折射,是Lavrans最喜愛的設計。
(50×30cm)

喇叭$14,000

如放大版胡椒瓶的喇叭,人手實木雕塑,分多截式裝嵌,Lavrans話最難是榫位接駁,還要雕空內裏的支柱放入高及低音喇叭。喇叭質量不俗,你亦可加錢選購心水品牌的喇叭。細看,兩個喇叭的音紋略有不同,表現出左右SurroundSound的聲波。
(150×26cm)

真係登登登凳的凳,超型,但Lavrans笑言幸好主辦單位無揀,因凳要計算力學更複雜,真要賣預計要4至5萬。

睇得見把聲

有無睇過自己把聲係玲瓏浮凸定平平無奇?來自意大利的音韻體感儀(MessadiVoce)把感應到的歌聲、話聲轉化成聲紋。PR話懂運音的方大同因懂控制聲調,聲紋平均,而我講「我愛你」的聲紋係我最羨慕的葫蘆身形,即係唔識控制把聲。

■用《命運交響曲》中最經典的「登登登凳」聲紋做成的純銀吊飾(價值$1,200),只要在場內消費滿$6,000或以上就可戴上身!

圓方×Lavrans音樂雕塑家品展

日期:即日至8月31日
地點:九龍站上蓋Elements圓方水區
查詢:27355234

*Lavrans家品每款限量10件,訂購日期至8月22日