曾華倩、羅嘉良、胡杏兒同廖碧兒等，噚日到荃灣宣傳無綫新劇《當狗愛上貓》，廖碧兒仲帶埋佢隻愛犬Bailey出席，各演員喺現場分別同狗玩競投遊戲，當中以着短裙嘅曾華倩最論盡，除咗俾小狗搞到氹氹轉外，仲差啲春光乍洩。
黃浩然帶住出場嘅狗仔仲喺台上便溺，令佢好尷尬，至於胡杏兒就俾主持攞佢同黃宗澤（Bosco）嘅緋聞嚟開玩笑，指佢帶領小狗做嘅動作名為「Bosco式站立」，搞到佢哭笑不得。
對於《當》劇嘅收視難免會同《溏心風暴之家好月圓》比較時，胡杏兒話：「《溏心》不嬲都口碑好，收視好係應該，呢啲冇得比，亦都唔會比較，佢哋卡士咁勁，不過我哋都有撈家（羅嘉良），而且我聽到好多人話睇我哋套劇好開心。」
華倩等異地戀
另外，曾華倩透露早前同家人到台灣旅行，佢嘅朋友仲話要介紹台灣男仔畀佢認識，不過最後佢因為太攰，所以冇赴約，曾華倩話：「朋友都係講笑，不過自己唔攰都會考慮出去，雖然睇相話我有異地姻緣，但我就未試過異地戀。我叫朋友下次組團畀我睇，始終感情係講緣份，嚟到點擋都擋唔住，冇緣喺隔籬同附近都冇感覺啦。」
