天時暑熱，唔少人盡量唔出街避開高溫，呢輪不少高官相繼外訪，唐唐早前去咗四川跟進20億賑災撥款安排兼睇大熊貓，點知遇到強烈餘震，財爺鬍鬚曾就飛咗去凉浸浸嘅南半球，到咗澳洲墨爾本出席亞太經濟合作組織部長會議。
徒手搬80磅重石屎板
財爺辦公室同好多機構一樣，一到暑假，就出現一啲年輕新面孔嚟實習做暑期工。鬍鬚曾喺網誌話，佢辦公室出現嘅兩位同學分別來自港大同多倫多大學，負責幫佢安排公開活動同準備相關資料，工作唔會輕鬆，而且「絕對」唔包括影印工作。早前自由黨田少轟煲呔請政治新貴人工高，但係好似特首辦前特別助理陳克勤，工作只係影印同遞水斟茶，鬍鬚曾𠵱家明寸田少，因為佢連暑期工都唔使幫手影印喎。
鬍鬚曾今期網誌又講番佢七十年代喺美國波士頓讀大學嘅時候，每年暑假都要打工賺錢。佢大學讀建築，暑假竟然走咗去地盤做散工，仲要係徒手搬運石屎板。佢要每日不停咁將一塊塊4呎乘8呎、成80磅重嘅石屎板，搬上樓做牆身，嗰時啲樓冇𠵱家咁高，好多只係七、八層，佢話如果啲樓有十幾、二十層咁高，就肯定搞唔掂。
講到咁辛苦，做嚟為乜？八方唔使問都估到答案啦，一字咁淺係「錢」。當時做文職嘅暑期工，時薪只有兩、三蚊美金，即係最多有成24蚊港紙，但係佢做地盤散工，時薪就有六、七蚊美金咁多，同外國人比，鬍鬚曾只能算係孱仔一名，不過為咗錢，辛苦啲都要頂住上。
鬍鬚曾又話，做得咁辛苦，但亦學到好多建築工作嘅細節同民間智慧，上堂都學唔到，甚至連建築界巨擘都未必知喎。講就犀利，睇番近期本地工潮一個接一個，政府完全冇出手，好彩有工會組織幫拖，幾間大公司嘅運輸職員最後都同資方傾掂數，達到起碼嘅加薪要求。鬍鬚曾30幾年前做暑期工，連最低嘅文職都有時薪廿幾蚊，已經高過𠵱家本地好多大機構仲係20蚊時薪，唔知鬍鬚曾幾時至可以運用佢學到嘅民間智慧，幫番吓啲捱更抵熱嘅本地低薪工人呢？
mailto:[email protected]