喺工廠區搵食都幾無癮，成條街都係茶餐廳同食堂，晚餐A同午餐C一模一樣，捱親都係碟頭飯凍飲加兩皮，質素有幾高可想而知。原本標籤工廠區無好嘢食嘅我，終於搵到工廠區嘅美食綠洲，呢一餐，對得住自己五臟廟咯。
記者：王震遠
攝影：伍慶泉、王文忠
好Hea雅座
老實，唔係趕住投注，都唔會踩入觀塘工廠區，更加無諗過落工廠區搵食。無計，一向印象，一街地舖茶餐廳，戙出門口啲餐牌個個千篇一律，食物無甚驚喜。好彩，觀塘工廠區仲有間「TheLaneBar&Restaurant」，深啡色招牌好沉實，唔似一般茶餐廳招牌又紅又綠咁招搖，如果唔係有幅大龍蝦海報壓頂，處身易拉架林立嘅興業街，真係行過都唔覺。入場，第一個感覺係好Grand，用白色做主調色，Menu、餐枱、餐具雅致，連擺門口嘅黑板餐牌同金屬卡片座都型仔過人，推開趟門有露天雅座，太陽傘下喫個Lunch，感覺好好Hea。
裝修靚無用，食物質素如何？呢間餐廳以海鮮同扒類做主打，久唔久會轉主題提供更多新菜式。熟客多，附近嘅老闆們都經常幫襯，食完飯順便開會，外國食客都唔少，正宗有口皆碑嗰隻，以後Happyhour唔使去尖嘴、中環，嚟觀塘都有着落啦。
（觀塘興業街1號駱駝漆中心地下C舖/31022302）
法式鴨髀$188
用香草同紅酒醃鴨髀，放入鴨油用低溫爐慢慢浸熟，之後鴨髀同鴨油分開待凉，跟住鴨髀再放番入鴨油，再入雪櫃雪凍，味道超甘香，皮脆肉滑，入口卜卜聲。
美國馬尼拉蜆意粉$158
馬尼拉蜆連鮮菇片、西芹、洋葱同甜椒落鑊，加白Rum酒、忌廉汁炒香。大大隻靚蜆爽口無沙，意粉帶忌廉香甜，好順滑。
時令生蠔每隻$26起
時令生蠔，空運到港保證新鮮，呢期有（左起）美國維珍蠔、FranklinHarbour、Colchester同Tasmanian，隻隻肥蠔入口爽甜，海水味濃蠔味夠重。
龍蝦沙律全隻$428
美國龍蝦加香料、牛油輕輕煎熟，黑魚子醬做Topping，羅文生菜、提子、蘋果伴碟。龍蝦肉好新鮮，彈牙得嚟啖啖牛油香，沙律清爽夠甜，味道一濃一淡係絕配。
法國深海膏蟹$340
蟹蓋大過你塊面，齋用上湯浸熟，加碎冰放凉凍食。原隻上份量十足，蟹膏超香，濃郁膏味歷久不散。
Semi-Freddo$58
忌廉、蛋白、蛋黃、呍呢拿條、朱古力碎混合成漿狀雪六個鐘，口感似蛋糕加雪糕，好甜。
食客有Say
Cat
我鍾意食蟹膏，一個人都擦得晒呢隻蟹呀。
Christopher
最正龍蝦沙律，龍蝦味好鮮。
Deli=Delicious
紅磡，又係老區，但老區都搵到好嘢食，鶴園街，喺某外牆掛住一個二個冷氣機嘅工業大廈地下，有間超級唔起眼嘅西餐廳「StanleyDeli」。
店名有意思，Stanley，係老闆洋名，Deli，比喻Delicious，即係美味。Stanley怕醜，唔肯上鏡，話：「我本身個Office喺附近，有時想同朋友舒舒服服搵個地方傾偈都無，附近又無同類型餐廳，我又鍾意食嘢喎，咪開番間餐廳囉。」Stanley鍾意食，廚師樂哥鍾意煮：「我主力做新派法國菜同意大利菜，每季都會轉Menu，會將新元素加入傳統菜式，希望可以創新求變，令客人保持到新鮮感。」
（紅磡鶴園街2G恒豐工業大廈二期地下B2舖/27745500）
薄酥紙焗深海銀鱈魚伴鮮番茄茸$250
四層薄酥紙皮包實銀鱈魚，焗熟一咬，魚味濃夠爽口，薄酥紙夠薄脆帶少少牛油香，銀鱈魚當堂無咁漏。
香草汁珍寶帶子片$130
大大隻厚肉美國珍寶帶子，一開三切成薄片，烤熟放上多士面，雜菜伴碟。帶子爽口彈牙，香草汁吊出帶子鮮味。
慢烚半熟挪威三文魚扒配合桃濃汁$180
雜菜同三文魚放入合桃汁慢烚，慢烚能夠鎖住魚油，三文魚肉質唔會變嚡，入口實淨有Texture，合桃汁增加魚肉口感。
澳洲M6雪花和牛肉眼$680
澳洲雪花和牛，雪花脂肪比例啱啱好，肉質夠嫩本身已經夠肉味，所以唔使醃，加少少鹽，輕輕烤就可以上碟，無吹水，真係入口即溶。
香煎鵝肝伴焦糖蘋果$150
煎香法國鵝肝，墊底生果片用焦糖處理過，味道少甜，Balance到鵝肝肥膩感，鵝肝入口即溶，唔嚡，滑嘟嘟好惹味。
法國士多啤梨拿破崙$65
意式甜品，一層酥皮。一層吉士忌廉，一層士多啤梨，層次分明賣相好靚，焦糖好香甜，顏色又靚，女仔一定鍾意食。
