鬼馬砵砵車 復刻周身銀

鬼馬砵砵車 復刻周身銀

唔少經典車系都推出復刻版,繼VolkswagenBeetle同MINI之後,意大利Fiat亦為500車系推出新生代版本;新車造型線條跟舊有相似,藉此保留當年經典形象外,同時又加入咗唔少現代化元素,希望將年輕型男潮女,皆成為自己的裙下之臣。

記者:鄭達基
攝影:林栢鈞

線條筆觸跟足當年

倘若要成為一代經典嘅復刻新生代,一個同當年相似嘅造型確實係箇中必備條件;正因如此,意大利Fiat喺設計經典500車系嘅新生代時,刻意喺造型勾畫上保留當年線條嘅筆觸,隨後再加入適量現代化元素,從而增加吸引力。
今次同Fiat500接觸嘅時間,比上一次喺Showroom進行拍攝工作長好多,所以有機會可以細意欣賞佢每一處。正如上文所講,新車保留有多年造型線條嘅筆觸,除咗線條傾向圓潤外,無鬼面罩嘅車頭Design,以及一字形電鍍邊裝飾統統得到保留;而現代化元素就包括連門邊鏡電鍍保護殼、頭尾泵把電鍍條邊嘅電鍍配件套裝、15吋18輻式(的確係18輻式!)合金胎軨等等,將之拼拼湊湊之後,得出嘅結局就係樣Cute得意,有當年影子之餘,都可以迎合年輕潮人愛型嘅要求。

■後排空間比想像中大,生得高大一樣坐得舒服。

■尾牌上方又有一條又長又令嘅電鍍銀,幾閃眼。

■15"胎軨屬多輻式設計,令經典車復刻都唔老土。

■直立尾燈編排,煞車燈佔一半以上,夠清楚。

■天幕為選購option,$8,000(未連稅)。

內裝齊料空間闊落

開初我仲以為外表的骰嘅Fiat500,車廂空間肯定異常擠迫,但實情原來相反。話說試車當日連我在內總共有三個人,最先安排生得高大嘅攝影師坐後座,沿途佢只係投訴過懸掛設定較硬,無詐過型話後座空間唔夠;及後到我試坐,竟然發覺有成40吋腰嘅肥仔都坐得落,仲要係唔逼嗰隻㖭!另外,車廂裝飾同軚盤等設備都用咗跟車身顏色一樣,加上由於屬頂級Lounge版,所以加咗個超大天幕式車頂,等你可以同車上嘅朋友有更多親近大自然機會。
在港發售嘅Fiat500,全部以1.4公升引擎作主力,馬力及扭力輸出分別為100匹及131Nm,而波箱則為5前速手波;不過,要揀的話我諗會畀多$8,850(未連稅)揀5前速Dualogic半自動款式,操作方法同Alfa嘅Selespeed半自動波相似,並可選擇全自動或手動模式,最正係當你使用全自動模式嗰陣,全車乘客唔會有「跪拜」情況出現,而開啓Sport模式後,加速反應仲會變得爽快,以改善車子性能表現。

■中控台同當年款式一樣以簡潔為主,波棍就移至底部。

■闊大兼屬仿桶形嘅前座,乘坐舒適度幾近爆燈。

■車內裝飾以至軚盤都用咗白色,但最搶都係紅色Fiat廠徽。

■錶板採用單一圓錶設計,中央仲有屏幕展示各種行車資訊。

■實驗證明,似我一樣有成40吋腰嘅肥仔,坐喺500嘅前座都算鬆動。

■雖然Fiat500車仔細細,但正因呢個特點加埋跑車懸掛,掟起彎嚟都幾定㗎!

超多車身貼紙任你揀

廠方為500推出多種搶眼到暈嘅車身色調之餘,亦同時推出咗超多款車身貼紙(售價$2,500起),任你自己拼砌自己揀,甚至連車匙保護套都提供埋,無論係型男定係潮女,想部車有自己Style真係話咁易。

■加咗超大號碼貼紙,好似落場賽車咁。

■估唔到原裝貼紙包埋格仔車頂,好正。

■呢張格仔地毯襯到架車絕一絕!

規格

引擎:1,368c.c.直4DOHC
馬力:100hp/6,000rpm
扭力:131Nm/4,250rpm
傳動:5前速Dualogic半自動波,前輪驅動
查詢:AutoSportiva(28778788)

每月供幾多?

首期:$21,920
利率:5%
年期:48期
每月供款:約$4,933
註:以上數據僅供參考