早前小妹咪提過去深圳買出前一丁平$1，嗰blog一出街，帶嚟好多網友嘅迴響。有啲人話去深圳買一丁水腳都蝕埋，但每月返去兩三次嘅網友Terry話，去深圳當然唔會淨係買一丁，仲有好多平嘢執。話就話𠵱家人民幣滙價水漲船高，港紙喺深圳唔見使，但識得窿路，掃佢一lot貨、玩佢一轉，加埋條數平過喺香港消費好多。
Terry好有見地話，羅湖地鐵站到國貿站一帶嘅食肆商店已經港式化咗，啲嘢同香港一樣咁貴，啲高檔酒樓冇晒特價點心，想平買平食嘅，一定離開呢啲港式化地區，好似華強北路啲嘢就平好多。
手機維修¥20
他如數家珍說，最喜歡去華強補鞋，補一次兩蚊起，五蚊止，喺香港要一百幾十。
Terry又話，佢最近部手機壞壞哋，之前去鴨寮街問價，要$300維修費，咪膽粗粗去華強啲手機店整，五分鐘搞掂，埋單¥20，「價錢平唔在講，佢喺我面前整，唔怕出蠱惑，最重要即刻有機攞，唔使好以鴨記咁要隔日先有機攞。」佢話之後去剪個髮包洗頭都係¥20，再高檔啲連埋按摩都係¥60，「我仲帶埋個女去箍牙，埋單¥10,000，香港要$30,000，你話係咪抵到爛。」吃喝玩樂冇所謂，但講到整牙，小妹都係冇膽試。
電郵：mailto:[email protected]
逢周六、周日刊出