新界東今年有10張名單角逐7個議席，焦點相信係民建聯陳克勤同公民黨曾國豐兩張新面孔，前者有劉江華帶挈獲外界睇高一線，不過劉江華噚日打告急牌，指今年形勢混亂，如果只係攞番四年前約95,000張票，好難連取兩席，所以要同鄉事派「炒大鑊」，並非爆粗開拖，而係同心合力炒一鑊和諧出嚟，強調雙方關係幾好，希望集中票源攞到超過10萬票。
佢哋噚日真係用蓮藕、蓮子等炒咗碟嘢出嚟，民建聯用食物款待選民隨時違規，不過指控係咪成立，相信先要確定嗰碟嘢係咪「食物」先。民建聯同鄉事關係好似好僵，另一邊廂公民黨就攝位搶鄉事票，湯家驊等人噚日扮客家人，曾國豐稍後更會用客家話錄音拉票。
自由黨田少噚日落區派單張，簡炳墀落足力幫排第二位嘅乖仔簡永輝，請埋富豪級朋友馬永壯站台。「食力簡」日前喺鄉議局爆粗狂鬧民建聯明恰鄉事派，噚日則恥笑民建聯名單嘅沙田鄉事會主席莫錦貴冇知名度，「食力」遠不及佢，能夠箍到幾多票成疑。