廣播處長呢個位真係三煞位，唔好講話要坐得穩，連坐上去都唔容易，馮強日前辭去城大傳訊公關處處長一職，隨即傳出佢新職係港台新台長，記者向佢求證，佢又唔否認喎，呢個美麗的誤會，不出24小時不攻自破。
馮強噚日朝早發出聲明，表示9月1號到浸會大學新聞系，任教國際關係理論同財經新聞寫作等科目，職級係首席講師。佢話一直喜愛教學，1979年中大畢業後，翌年已兼任中大新聞系講師，教授財經新聞採訪，今次係重拾教鞭。
多個「疑似台長」中空寶，商務及經濟發展局局長劉吳惠蘭噚日透露，已物色到真命天子，好快就有公佈，大家唔使再估吓估吓。