宣佈唔再參選嘅陳四萬，噚日唔怕天時暑熱，再次現身為泛民候選人拉票，過程中唔少街坊拉住佢影相，搞到好似佢自己參選多啲。一向的士、私家車代步嘅陳太，噚日完成活動後，同好朋友、民主黨創黨主席馬丁齊齊離開，喺個靚手袋攞出一張膠卡，八方睇真啲，原來係張八達通。
陳太攞住張八達通喺人群中迫迫吓，原來係去旺角港鐵站坐港鐵。陳太話由於旺角成日塞車，又好難泊車，所以近日到旺角出席選舉活動，都係坐港鐵來回，幾星期前試過，發現好方便，自此成為常客。陪陳太坐港鐵嘅馬丁就話，坐港鐵環保又方便，自己揸車去旺角好難搵位泊車，為免遲到都係坐港鐵好啲。