股市下跌，人人不爽，中國股市今年跌到殘，以上半年嘅走勢睇，全球股市之中最差，唔見咗五成以上，去年十二月尾入市之股民，不知何時可以翻身，至於在滬綜指六千點入市嘅股民，更加有排捱。
呢日稍為得閒，在屋企清理舊雜誌，一本一本咁掉，冇法啦，寫稿佬花大量金錢買書買雜誌買報紙，偏偏冇更多嘅錢買大屋，屋企邊度有咁多地方擺書刊呀，唯有聽老婆命令，定期掃走舊報刊，至於啲書就唔捨得掉咯，一於將書架擺到插針不入，想搵本舊書，用咗二十分鐘。咁啱一路清理舊書報刊之時，Now播出一套新占士邦DanielCraig嘅舊片，叫做LayerCake，電影裏的一位大壞蛋/幕後大哥係藏書甚豐之有錢人，家中有一個大書房，面積近五百平方呎，高到可以做多一層閣樓，啲書擺到上天花，要用長梯爬上書架高層。唉，左丁山睇到流口水，只恨此生不能擁有如此書房。
一邊掃走舊雜誌，一邊揭開睇幾頁，睇吓有冇值得剪存嘅資料。哈，二○○七年十二月三十日之《亞洲周刊》第四十一頁有一篇記者江訊嘅報導，講內地炒股歌詞，當日Ａ股比今天高出甚多，但內地已有股民哀鳴：「中行、建行、農行、行行出事；Ａ股，Ｂ股，Ｈ股，股股下流；昨天，明天，天天下跌；主板，小板，三板，板板完蛋；農民，市民，股民，家家難民；股市，樓市，車市，市市傷心；股票，鈔票，彩票，票票害人。」左丁山睇番，幾乎笑到碌地，內地股民畢竟能講能寫，為股票哀鳴，都零舍過癮。
之不過，○七年十二月，已經如此，今天滬綜指跌到得番二千七百幾點，豈非更加慘情？當日內地股民齊唱，「起來！起來！起來！我們萬眾一心，冒着崩盤的危險錢進！錢進，錢盡，盡！」今時今日，更要學上海股民講幽默：「蜜月叫長陽線，分居叫停牌，再婚叫重組，懷孕叫含權，分娩叫除權，餵養是填權，與老人住在一起叫整體上市，與老人分開住叫股權分置……包二奶是主營外收入，尋花問柳叫做多，山盟海誓叫股市泡沫。」多謝江訊將內地苦中作樂之言帶到左丁山眼前，輸咗股票都冇咁㷫！