鄭州燃氣（3928）由上年7月到家陣，足足跌咗64%，預期PE單位數，好抵搞。鄭燃07年度（12月底止），因為應課稅計算方式有變，稅務支出多咗6倍到6670萬銀（人仔．下同），但純利依然增長咗15%到1.28億銀，而股價跌足1年，往績PE得7倍幾。
要咁睇，今年頭，鄭燃投得河南省平頂山市燃氣27%權益，正式打開跨區經營之路，兼且成為08年增長新動力。又喺2月，集團兼攞到鄭汴產業帶、為期30年嘅管道天然氣特許經營權。呢個產業帶，正係配合中部崛起嘅重點發展區域，鄭燃食住呢條水，有排肥。鄭燃喺新業務嘅貢獻開始反映，保守計數，08年度只係溫和增長20%到1.54億銀，預期PE跌到得番6倍幾，殘到爆。以鄭燃08年度10倍PE做目標，鄭燃要上番1.37元，即係話，現價（0.92元）要翻近半番，目標PE水位，仲仍然好吸引。
粵首短炒博升36%
粵首環保（1191）橫行半年，幾條主要平均線叠埋一齊，要開始昅昅。粵首呢期轉型主打脫硫業，08年半年度（1月底止）嚟自環保業嘅分部溢利，上4200萬銀，唔係曳，照計全年度應該仲省鏡。又粵首最新NAV約莫0.37元，現價（0.19元）折讓48%。同類A股龍淨環保（滬：600388）及菲達環保（滬：600526）全部無折讓，粵首夠吸引。呢轉短打，博粵首上番2月高位0.26元，潛在回報率36%，未有耐到NAV水位。