我求大俠真係戥一班同事鬆口氣，因為轉會麻煩友之一嘅艾廸巴約，終於「薪」亥革命成功，加人工後即答應同阿仙奴續約，唔使再估佢去巴塞定係AC喇。艾廸巴約早排跳晒草裙舞話想走，𠵱家留喺阿仙奴有得續約同加人工，都係算咁啦！
艾廸巴約8萬鎊周薪
艾廸巴約轉會呢單嘢，相信都搞到好多球迷躁晒。一時又話天價投巴塞，一時又話去意甲AC搵食，真係煩到冇朋友，所以大家都應該好高興聽到艾廸巴約續約阿仙奴。跳完草裙舞嘅艾廸巴約都有出嚟講番件事，佢話：「我𠵱家喺阿仙奴踢得好開心，我嘅心真係同阿仙奴同在㗎！」雖然唔知大家覺得艾廸巴約講嘅嘢有幾真，不過佢有得加一倍人工（約8萬鎊周薪）續約4年，以上季佢淨係得半季貨仔交，阿仙奴都待佢不薄喇。
其實艾廸巴約啲麻煩嘢又何止扭計咁簡單。唔知艾廸巴約係咪一個基督徒，上季佢就喺季中無端端剪咗把長髮，諗住學非利士人剪走參孫啲頭髮咁，睇吓會唔會冇咗啲神力，點知佢下半季真係腳風完全唔順，十足《聖經》故事嘅足球版。計我求大俠話，艾廸巴約唔係下半季大跌watt，應該晨早可以跳槽啦，如果今季留番長髮，打番好啲實大把球會吼嘅！
除咗搞掂咗艾廸巴約之外，阿仙奴近期仲定埋隊長人選，由上季嘅加拿斯繼續戴起隊長臂章。加拿斯仲拍晒心口話會改善上季嘅甩漏，而領隊雲格都開到口話撐佢。阿仙奴𠵱家睇落一條心，下季真係有啲憧憬喎！