會考聽日放榜，八方理解考生一定好緊張，但大局已定，既來之、則安之，諗清楚有乜出路仲好。十幾萬考生心情忐忑，其實仲有一個人都好大壓力，特首煲呔肩負國家領導人指令，要「親自過問、親自掛帥」搞好奧運馬術賽，奧運即將開幕，佢嘅心情可想而知。
任期屆滿即退休
噚日香港電台舉辦咗個為會考生打氣嘅營火晚會，邀請煲呔到場為考生打氣兼BBQ，煲呔民望連月下跌，施政評分低處未算低，比起會考生，煲呔似乎更需要班年輕人幫佢打氣。煲呔之前揚言視民望如浮雲，噚晚一邊燒雞翼一邊講廢話，指考試不是求分數，人一出世就不斷俾人評分，佢每日都俾傳媒評分，惟有以輕鬆心情面對，又勉勵（自勉？）考生就算低分都唔可以放棄。
煲呔任期至2012年，佢噚晚話屆時會退休，因為年紀大，做足40多年公職「夠皮咯」，希望退休後同孫女去旅行及學希伯來文，方便讀聖經。老董落台後，煲呔做埋餘下任期，按當年釋法結果，佢做埋呢任冇得再做，唔退休都唔得，事實上佢近來施政頻頻失誤，民望不斷尋底，可以話成績表「滿江紅」，莫講話重讀，留班都未必有資格。
「奧馬科」就殺到
話口未完，煲呔就要考試，當務之急係辦好奧運馬術賽，呢一科係「必修科」，習副主席下令煲呔要「親自過問、親自掛帥」，萬一賽事有任何差池錯失，恐怕煲呔被趕出校都有之。
舉辦奧馬成績如何未放榜，不過喺市民眼中，相信煲呔施政早已肥佬，委任副局長、政治助理冇規冇矩，豁免外傭稅搞到一鑊泡添煩添亂，唔少僱主都狂鬧政府低B兼白癡，連民建聯都向佢開火，噚日喺街頭舉行「特首放榜得幾分」活動，市民可就特區施政評分。煲呔施政倒行逆施，攞U絕冇難度。
民建聯話市民最不滿煲呔打擊通脹無方，雖然豪擲110億元想買起民望，可惜唔係人人受落，所以好多人認為佢唔及格。而喺社會福利方面，增加「生果金」、傷殘津貼等通通得個講字，咁多政策都令市民睇唔過眼，有班會考生肯幫你打吓氣已經算好㗎喇。
mailto:[email protected]