繼擊敗喀麥隆後，荷蘭昨晚在大球場以1:1賽和科特廸瓦，成功奪得奧運足球四角賽的ING挑戰賽獎盃，為爭京奧獎牌注強心針；但非洲隊喀麥隆及科特廸瓦在賽事表現一般，尤以處理臨門一腳明顯不夠火候，看來「黑勢力」不易在京奧足球賽中抬頭。
荷蘭今仗收起皇家馬德里中場德倫特，改由阿積士的艾曼紐臣擔任左中場，進攻節奏及守力均有改善。另外，利物浦前鋒賴恩巴布亦正選披甲，開賽14分鐘，橙軍以艾曼紐臣的罰球妙射破網，荷蘭先開紀錄。
科特廸瓦把握力差
與美國對喀麥隆相比，荷蘭對科特廸瓦這場06年世盃小組賽翻版戰，球員的技術和鬥志都遠勝一籌，令現場逾6,000名觀眾看得津津樂道；論埋門機會科軍其實較多，只是臨門一腳欠佳致半場落後。
換邊後僅兩分鐘，科特廸瓦把握荷蘭防守不集中，由伏兵門前的隊長謝雲奴扳平，可是該隊長及後射空門失機，雙方最終1:1言和。結束兩日共四場賽事，荷蘭以7分封王，而兩支非洲隊喀麥隆與科特廸瓦，則分佔2、3位，但值得關注是兩隊各只入一球，這與處理臨門一腳不夠質素有關。
科特廸瓦教練基利賽後承認，球隊今仗有機會擊敗荷蘭，他說：「經過今次熱身賽，我相信球隊只要團結便能在奧運爭取佳績。」喀麥隆教練尼廸高在小勝美國後關注攻力，並設法在餘下時間改善缺點。喀麥隆在京奧被編在D組，與南韓及意大利同組，而科特廸瓦在A組遇阿根廷及塞爾維亞等勁旅。荷蘭教練廸漢則表示，奧運前捧盃肯定有助加強球隊爭奪獎牌的信心。
美國包艇仍具信心
頭場方面，喀麥隆甫開賽便採取壓迫性踢法，令美國防線大亂，而美國中場重心米高巴特利在禁區內侵犯喀麥隆球員被判罰12碼，喀麥隆由捷奴主射破網，而喀麥隆亦憑這個入球取勝。
雖然美國此行兩戰未勝兼零入球，但教練勞域克在球隊不敵喀麥隆後，對即將展開的京奧仍感到樂觀：「在這裏集訓及友賽，對球隊適應天氣及提升狀態有很大幫助，相信以目前戰意在決賽周有能力與任何強隊一拼。」與荷蘭同處B組的美國今日離港，起程到京奧賽場的天津作最後準備。本報訊
《花絮》
球迷轉行操啤、打機
噚晚入場嘅球迷，相信主要都係捧荷蘭，但亦有唔少球迷早入場睇頭場美國對喀麥隆，因為非重點賽事，現場所見，有球迷為免悶親竟然帶埋啤牌入場，邊玩13張邊睇波，另外亦有球迷喺頭場期間差唔多完全唔睇波，只顧玩手中的PSP。
靚女幫你撐愛隊
大球場每逢有大型國際賽事，都有商號趁機搞推廣，今次就有個足球網站擺攤位，幫球迷噴國旗喺塊面度之餘，順便宣傳，當中女工作人員仲率先將喀麥隆國旗噴上面，認真唔話得。
留票尾隨時東瀛遊
賽會為吸引球迷入場，噚日就舉行幸運大抽獎，入場球迷只要保留票尾，就有機會贏取日本的2010世界盃亞洲區外圍賽主場門票兩張，連三日兩夜酒店住宿、波衫同簽名足球，而賽會為免球迷唔記得呢個遊戲，仲喺球場入口向球迷派發大大張嘅單張，提醒球迷咁話。
喀麥「龍」波衫怪相
喀麥隆門將泰恩比，對美國時左飛右撲，身手都幾吸引。不過最有趣就係佢件守門員波衫，前面同後面嘅6號字樣，竟然只係用膠紙貼上去，又貼得唔夠正中，感覺古古怪怪咁。
球迷反應
Ian：買高價飛為攞簽名
與爸爸媽媽一齊入場，為咗拎球星簽名，特別買貴價嘅門票。今次收穫好豐富，4隊加埋已經攞咗17個球員簽名，馬卡爾、沙洛文卡勞全部有齊，好開心。
屈小球迷：荷蘭奧足隊冇期望
自己鍾意荷蘭，不過最愛球星洛賓就冇入選奧運隊，至於今次來港的這支荷蘭隊，感覺實力不及他們21歲以下代表隊，個人對佢哋今屆奧運不會有太大期望。
陳先生：森巴訪港仲吸引啦
荷蘭對科特廸瓦鬥攻，單是這場已值回票價，如果足總想搞得好些少，就應該請巴西奧運隊來港，同香港隊比賽，就會更加吸引。
