係，工廠區十間有九間都係茶餐廳，仲要毗鄰垃圾站、停車場、車房……地踎？又未必嘅，搭𨋢上樓，陰森工廠大廈都搵到高級西餐廳，係驚隱蔽過頭，驚你唔識搵啫。
記者：洪偉順
攝影：楊錦文
模特兒：Candy、Cod@BeamEntertainment
捧場記得訂位
「G.Gallery」老闆Gary，本身喺長沙灣廣場開凍食公司，專買新鮮外國海產同靚扒，「有熟客識買但唔識煮，建議我煮埋畀佢哋食喎，所以咪喺工廠大廈搞番檔上樓西餐廳囉。」請專業廚師駐場，一開店有熟客捧場，開業至今年幾，午餐同晚餐都要訂位，「試過有Walk-in客嚟到但無位，即場發爛渣！」大家有心捧場，記得訂位嘞。
（荔枝角長沙灣道883號億利工業中心402室/35830701/星期日休息）
海鮮大盤 時價約$600
象拔蚌、加拿大翡翠螺、深海海蝦、澳洲黑青口、英格蘭咖啡蟹、大連鮮鮑仔、及當造澳洲CoffinBay生蠔、塔斯曼尼亞生蠔，無受污染勁重鹹水味，唔使搞咁多，點水果配製嘅酸醋汁，已經激得出海產鮮味。
塔斯曼尼亞黑豬扒配啤梨汁$198
澳洲塔斯曼尼亞豬有乜好？用草、薯仔等天然飼料，豬味濃夠Juicy，配啤梨汁，味道出奇地夾。
情侶撐枱腳之選
柴灣工廠區食肆唔少，可惜，唔係茶餐廳就係快餐店。要搵法國餐廳，只Ricky主理嘅「LeMieuxBistro」一間，開業一年，客人九成係熟客，「好多男仔帶女朋友嚟捧場㗎，但好多女仔又以為男朋友玩佢哋喎，講極都唔信工廠大廈有法國餐廳。」餐廳有半開放廚房，睇住廚師做菜已經係賞心樂事，晚餐每位$650，六道菜包餐湯、頭盤同主菜，碟碟都係心機之作。
（柴灣嘉業街18號明報工業中心B座407-8室/25582877/星期日休息）
龍蝦三文魚青蘋果沙律（前菜）
清爽前菜一道，三文魚碎肉刺身墊底，中間有龍蝦肉，青蘋果鋪面，點特製日本芥末醬，微辣好開胃。
燒法國鵪鶉（主菜）
惹味主菜，鵪鶉燒完肉色保持粉紅，鵪鶉肉質嫩滑，上碟擺到好似個結他咁，賣相加分。
製餅工場變餐廳
「UnoUno」由製餅工場變身而成，本身為酒店同餅店批發西餅，老闆把心一橫闢工場一半地方改成餐廳，等客人可以第一時間食到新鮮靚蛋糕西餅。Lunch時段吸引到好多OL幫襯，一個餐加$10，就可以食到一件酒店質素嘅甜品。
（長沙灣750號廣大工廠大廈1樓/27276128/星期日休息）
酥皮焗雞扒拼串燒海鮮伴扁意粉配礦加西汁$58
礦加西汁，即係意大利特濃番茄汁，用茄茸製成，配雞扒去肥膩感，海鮮串同意粉好香口。
鵝肝拼鴨胸伴薯菜配蜜糖黑醋汁$78
為減鴨胸同鵝肝肥膩感，加蜜糖黑醋汁可以容易入口啲。而份量都唔細，你睇鴨胸原隻就知無偷工減料。
