iPhone3G手機由上個月推出至今不足一個月，但係買入同賣出價嘅跌幅簡直係快過過山車。近排喺網上討論區，見到唔少人講緊iPhone3G已經冇人吼，行貨收購價每日都跌一跌，好彩我當時忍到手，冇用成萬蚊嘥錢買。
好似討論區getjetso嘅網友canle就話，見到旺角先達商場有舖頭索性貼咗張紙出嚟，寫明「本店不收3G-iPhone請勿打擾」，講到明唔想收機，叫人唔好再問價。有啲舖頭就日日降低價錢，以水貨8GB為例，就由早排$10,000減到$8,000幾，𠵱家甚至只係收$7,000幾蚊咋！
噚日經過先達商場，我走入去問吓iPhone個價，大部份舖頭都話行貨8GB收購價係$7,000幾，如果買水貨新機嘅話，8GB都係$8,000、16GB就要$9,000多啲。比起啱啱推出嗰陣8GB要賣成萬蚊、16GB要萬二、萬三，大大話話都平咗兩成。
舖頭老闆同我講，因為𠵱家iPhone3G嘅貨源已經穩定，唔會好似之前冇貨，所以炒價相對回落，但𠵱家仍然有好多客人買，所以價錢都會有幾百蚊上落。不過，我就覺得大嗱嗱$8,000買部電話始終都唔係好化算。
逢周六、周日刊出
電郵：mailto:[email protected]