225匹馬力加Turbo，一身橫練內功，不過，Focus外形低調無乜侵略性，唔似一般頭冚穿個窿入風、惡形惡相嘅五門辣跑咁招搖，唔識嘅真係俾佢快閃𠝹一嘢都未知咩事，絕對係公路狙擊手。
不過，今次呢架小改FocusST就辣到出面，唔只全車包圍拋沙板，再配全新18吋合金軨同尾翼，加上六前速手波快狠準，明刀明槍，依然火力十足。
文：嘴嚼爺
由內辣到外
玩OnlineGame最鍾意做Sniper，鬼鬼祟祟偷番薯，殺敵人一個措手不及，所以我好欣賞上年抵港嘅FocusST，身為高性能跑車個樣卻唔得人驚，慢慢行無人撩你，踩得快又有驚喜；不過，好多人鍾意做Rambo，縛條頭巾開槍仲要大聲嗌。為滿足各有喜好車迷們，新到港FocusST就瞄準大圍喜好，唔只擁有高性能引擎同深受讚賞嘅底盤設定，仲將外形加辣，由車頭鬼面罩到車尾風翼，令人離遠都感受到火辣辣。不過呢隻ElectricOrange顏色要畀多萬五蚊，抵唔抵見仁見智，不過虛榮嘅我，突然覺得呢隻「電橙」色真係好型。
棍仔夠直接
前座依然有一雙Recaro桶Seat，橙灰雙色，正！改用FordPower免匙系統，褲袋條匙唔使攞出嚟，㩒個掣架車就吼一聲。225匹加Turbo，唔敢睇小，不過我最留意都係副六前速手波波箱，始終𠵱家加減波當道，物以罕為貴。加速一段，意料之內地霸道，始終手波感覺最直接，好爽！而懸掛則明顯調校得跑車化，轉向更屬FocusST強項，拖波扭軚入彎非常咁得心應手，最啱飛石澳。車價唔使30萬，玩就真係滿分。不過如果真係買車，有樣嘢會令我個心十五十六，就係2,522c.c.，牌費要計2.65公升以上。若真係買得車嘅，都唔爭在每年嗰兩千蚊，油錢都喺度啦，咪講笑啦！
FocusST規格
引擎：2,522c.c.直五Turbo
馬力：225ps/6,000rpm
扭力：32.8kgm/1,600至4,000rpm
傳動：六前速手波，前驅
查詢：福特香港（25031032）
