3Market：<br>車仔飄移　勁過真車

3Market：
車仔飄移　勁過真車

相信大家都唔會對「Drift，飄移」這個詞語陌生，由N年前的「極速傳說」到「頭文字D」，對男生們而言，駕着快車甩尾飄移這動作，不知幾威風。不過，在香港幾部車一齊行都隨時犯法，更莫論玩飄移，所以有人就選擇玩遙控車解渴！皆因1:10縮水遙控車，跟足D1真車原理，同樣得到滿足快感，而且唔使考牌，唔怕油價貴，最重要是隨便空地一塊，喪玩都唔怕拉！

記者：劉明慧
攝影：陳陶鈞、伍慶泉

Gary—車隊主腦之一

飄移年資：兩年
車仔改裝費：約$2,500
收藏：兩架飄移車及車殼4個。

近一兩年開始玩飄移車，對車仔瘋狂到與友人開舖賣車仔。

阿益—車隊攝影師

玩車年資：約兩年
車仔改裝費：約$2,000
收藏：兩架MChassis及一架飄移車。

因為愛車又愛影相，所以每當車隊練習或比賽，都會隨隊拍攝，之後更新上網。

傑佬

飄移年資：兩年
車仔改裝費：約$6,000
收藏：一架飄移車、一架MChassis及車殼10個。

十二、三歲開始玩遙控車，兩年前轉玩飄移，但已在比賽中得過兩次冠軍。

落場玩好過打機

眼前這群車迷來自一個叫SD-Hobby的組織，主腦之一Gary話：「我哋每逢星期三、六晚8時正都會有聚會，玩賽車練飄移，每次都玩到凌晨1點。」女生或許不理解，但當看到多部閃着燈的飄移遙控車高速在面前飛過時，場面之震撼，實在難忘，加上玩家個個笑容滿臉，絕對沒有電影中飛車黨的凶神惡煞感覺，總之那份刺激感就點都好過去機舖打機。「其實香港好多地方都有人玩Drift，不過近年香港多咗同類比賽，吸引咗批新人，Drift又再次流行。」現時成員約有20人的SD-Hobby，會員平均年齡25歲，別以為他們柴娃娃，他們為參賽做隊衫，就連落場車都統一為橙白色，兼設網站及討論區，好Pro㗎！說到尾，為何獨愛飄移？「無得玩真車，咪玩飄移遙控車，而且唔怕被人拉，比玩真車安全得多，撞爛咗都無咁肉痛。」原來男生們骨子裏都係想學拓海玩飄移，車仔就可滿足他們。

■隊車全部清一色橙白色，各人再加自己喜愛的圖案花式，統一得來，各有特色。

■飄移的最高技巧是車與車之間在超貼的距離下，同時飄移及超越前車。

■成班人一齊玩，有甚麼搞作？就是不斷想新招式，例如齊齊飄移過褲浪。

■車迷每星期都會到元朗玩飄移，有時租場，有時就在雞地球場鋪路碟起壇玩賽車。

■排隊等開始示範飄移，技巧是以最貼的距離超前對手，但又要做到最靚的飄移效果。

改車第一技術第二

咪以為車仔細細，每架都價值不菲，Gary指遙控車由百零蚊至幾千蚊都有，豐儉由人，「初哥買套裝車平均約$400，不過車款較少，但一樣玩到飄移。老手就會將車款同配件分開買，再自己改。」新手最常用的是1:10YokomoDriftPackage遙控車，因為其照足D1真車構造，有啲仲型過真車，買返嚟自己稍為改裝就可以帶出去玩。「玩飄移遙控車除了玩技術，更好玩的是改裝，因為車殼買回來是透明膠一個，加上合金軨、死氣喉、再貼花上色，就成了自家出品。」雖則這些全部都無特別功能，純為裝飾，不過就能夠滿足個人虛榮感！想知實際點改？即場解剖過你睇。

1.強化車架

拆開膠殼，看到遙控車內部，細細架車但零件多多，絕不比真車輸蝕。而原裝車架一般用硬膠造，亦可換較硬淨的Carbon強化架，價錢過千。