暑假檔戲院依然強勢！蝙蝠俠、威E、盜墓3，要等佢哋出碟相信要係10月後嘅事。碟場仍以暑假前上畫二線戲當道，今個星期揀《軍鷄》，起初聽「路邊社」評論，本住嘅心係無期望。點知睇落．變態嘅余文樂真係幾搶眼，純暴力、血腥，雖然由三級原著漫畫DownGrade成IIB電影，不過一樣睇到血脈沸騰。
記者、攝影：朱崇德
電影題材 社會禁忌
《軍鷄》可算日本近代血腥暴力漫畫代表作，故事主角成嶋亮（余文樂飾）弒父母成少年犯，及後更殺人強暴、童黨圍毆雞姦，將社會種種禁忌貫穿於故事中。不過漫畫意識更大膽，將三隻手指指住鼻樑插眼、如何直拳腳踢使出更大破壞力，簡直係一本實用殺人手冊。而香港暴力美學新派導演鄭保瑞（曾拍《狗咬狗》），將《軍鷄》搬上銀幕時則壓製成IIB級別，當中不無原因。
畫質一般 靚聲搭夠
$80/D5版《軍鷄》，買佢上手時對聲畫表現都無乜期望。開機試播，畫面輕微起格已係意料之內，但電影黑位特多，粗微粒問題更見嚴重；Making係三、五分鐘無聲默劇，再加極膚淺相片集，誠意好成問題。可幸DDEX6.1聲效打到嘭嘭聲，都叫扳回不少分數！電影以多場拳賽、對決貫穿，初段樂戰泰國拳手以弱勝強幾有睇頭，但樂弒師一幕，相較漫畫版真係少咗幾分煞氣及凄凉之感，實在有點可惜。
K-1王者 尾場壓陣
電影戲肉絕對係尾場與菅原直人（摩裟斗飾）終極對決。大家可知摩氏可是日本K-1界王者，一身橫練肌肉，再加拳腳出手快如風，樂仔簡直可以用人肉沙包嚟形容。電影結局好多人都話摸不着頭腦，但套入漫畫理念，現代武術好多時都轉型為舞台上競技運動；但對於古式空手道家，每一場都是生死對決，以廢去敵人作戰能力，甚或一招取命為目標，這樣大家可能對電影結局會有另一番體驗。
Profile
戲名：軍鷄
碟種：DVD
區碼：3區
片長：106分鐘
音效：DolbyDigitalEX6.1（粵/國）
片長：106分鐘
價錢：$80
