議員L上屆自動當選，今年以為座定粒六，誰知突然殺出一位S先生，向議員L挑戰，於是放唔到暑假，要籌備競選。左丁山問過不少朋友，冇人認識S先生，只憑報紙報導，知道佢係爵士姪孫，屬唔憂米一族，至於何解出來競選，請政治版記者追問之。
議員L一面要競選，一面要為自己間工廠與行家到珠三角向領導人反映意見。據佢講，去年珠三角官員口氣好硬，話明要遵循國策，趕走或送走啲三來一補/來料加工企業，要低增值，高耗能之勞工密集企業搬走。當時嘅口號係「騰籠換鳥」，即係話騰空鳥籠，引進新鳥（高增值，高科技，低耗能企業）。
點知一年後今天，輕工業重鎮東莞市發覺有過千家鞋廠關門結業，人去樓空，籠內鳥兒飛去了，卻不見有新鳥飛進來，變成一個「鳥去籠空」嘅尷尬局面，連帶東莞市嘅五星酒店都生意拍烏蠅，於是惟有來一次大轉軚，話明大力扶植勞力密集企業。議員L去年上到東莞一帶向官員為香港企業說項，花盡唇舌，不得要領，想唔到最近再到珠三角巡遊一次，官員已經完全唔同面口，對外來投資表示無限歡迎。
於是議員L感覺到政府立法或推行政策，不能操之過急，必須多聽各方面意見，從長計議，否則一年後大轉軚都嚟唔切，傷害已成。目前特區政府好興以「為咗香港好」之名，立法管制各行業，例如「食物標籤法」，將來之「最低工資法」、「競爭法」、「停車熄匙法」、「建築物能源效益守則」等等，無一不以愛心、公平、環保等口號為出發點，樣樣話合乎市民利益，實際上皆以大政府之心出之，極為擾民，而且未必能夠產生預期效果，反而增加商業之交易成本，窒礙新職位之產生。上述等等新法，究竟有無做過經濟效益評估，我哋唔知，但特區政府似乎以心辦事，不是用腦辦事，無怪議員L深以為憂也！