今屆立會選舉提名期噚日結束，地區直選同功能組別各有四人趕上尾班車參選，已報名出選新界東嘅北區區議員葉曜丞，則喺最後關頭「落車」，噚日突然宣佈退選。
退選因隻腳有事
葉曜丞一名競選助理同八方講，葉生退選係因為「隻腳有啲事」，至於係咪好似老董咁有「特首病」，競選助理以未收到醫療報告為由，暫時未能確定，又話其實葉生身體素來麻麻，三思後終於接納醫生勸退。地區人士估計，葉曜丞參選較影響田少，笑言佢個醫生，唔知係來自西環定係自由黨呢？
八個最後衝刺報名人士，分別係出選港島嘅袁大明同蕭敏華、九西王紹爾、新西鄒秉恬、漁農界梁和平、會計界黃宏泰，建築、測量及都市規劃界再有兩人陳贊輝同陳耀輝參選，形成五人混戰局面。
梁和平硬撼黃容根，顯示民建聯擺唔平地區恩怨，王紹爾可以話係「民建聯黎志強」，「陳偉業寃家」鄒秉恬屢敗屢戰，令人費解。
今屆唔少參選人寂寂無聞，十分有「炮灰」相，能否攞到百分之五選票成疑，五萬蚊按金凍過水。