大家應該記得喺05年12月，香港特區舉辦咗「多哈回合」其中一次嘅世貿會議。當時，作為香港絕無僅有嘅自由市場組織，獅子山學會研究總監孫柏文當然有去灣仔會展嘅會議場，力挺自由貿易。特區團體當中，得我哋撐freetrade。
不過，如果問大家對於嗰次世貿會議記得啲乜，相信大家都會答：「韓農襲港！」真係好難忘記班韓農採用暴力手段之後，一路幫佢哋搞示威嘅李卓人同佢老婆個樣。擘大個口得個窿，完全呆晒。冇辦法，因為未用暴力手段之前，班韓農仲喺度「三步一跪」和平示威時，李卓人同佢老婆仲喺度勁讚班韓農示威手法好得。果然好得。
食物係國家安全
我仲記得，當時班韓農毆傷只係想維持秩序嘅警員，第二日居然有本地傳媒機構挺韓農！Ohshit。你話班韓農為咗崇高理想，都可以理解。不過啲韓農只係想維持居住於南韓市區嘅低下階層市民，繼續冇得揀買越南農民生產嘅稻米，要侷住「進貢」血汗錢畀韓農。
到咗今日，傾咗好多年嘅「多哈回合」世貿會議，根據世界各大報章嘅結論，失敗結束，原因都係因為農業貿易冇共識。
基本上，農業貿易嘅磨擦點，就係各國政客好民粹咁話：「食物係國家安全，所以要補貼。補貼下如果生產太多，就應該賤賣出口。」跟住其他國家嘅政客答：「即係我哋可以平價進口？不過咁樣我哋咪冇農業？一旦被貿易封鎖，我哋咪大鑊？食物係國家安全，所以要補貼…」
拖累服務業開放進程
其實最諷刺嘅地方，就係個個話要保護自己農業嘅國家，都係面對非常嚴重嘅食物價格通脹。農民如果有效率，應該可以無需要補貼、保護維生。不過，「多哈回合」因為農業而死，我真係覺得非常可惜。因為「多哈回合」唔係淨係講農業，亦都講服務業開放競爭。服務業嘅經濟百分比，仲要遠比農業大得多。
咁「服務業」即係講緊乜？記得當時嗰份文件，第一個話要開放嘅「服務業」，就係法律服務業。即係講緊香港人可以自由聘請來自前宗主國、澳洲、新西蘭等嘅大律師打官司。外國大狀價廉物美，如果「多哈」冇死，特區大律師就會面對佢哋最鍾意講嘅競爭。多哈死，特區大律師最開心。不過大家就會繼續因為一場官司，一夜之間中產變無產。
網誌： http://phatdat.blogspot.com