泳兒前晚喺九展舉行《拉闊變奏廳》音樂會，一班師兄師妹包括有吳浩康、陳偉霆、鍾舒漫同湯怡都有去捧場，至於泳兒嘅媽咪就戴住口罩到場為乖女打氣。當晚泳兒主力唱張學友嘅歌，學友亦特登錄咗段片幫佢打氣，學友讚泳兒係唱得之人，對佢好有信心咁話。
之後泳兒着住背心短褲勁歌熱舞大唱學友嘅快歌，好似《頭髮亂了》同《非常夏日》，佢仲跳到露出黑色底褲。泳兒好興奮咁喺台上叫觀眾玩人浪，點知台下面一啲反應都冇，之後佢再叫觀眾企起身跳舞，但同樣係冇反應，結果佢班師兄弟妹見到咁嘅情況惟有立即起身撐場，之後啲觀眾先至跟住起身跳舞。泳兒後來換咗條吊帶裙唱慢歌，不過其中一邊吊帶成日跌落嚟，鬼咁論盡。
打咗強心針
事後記者同泳兒講到啲觀眾唔起身，佢話：「佢哋怕醜唔企啫，我都未試過叫觀眾起身，係第一次，豁出去，死都要叫佢哋起身。」之前泳兒病咗入醫院，佢話冇影響到表現總算OK，至於跳舞就係臨時加插，因為想觀眾開心啲，但只係練咗兩個半鐘，好彩冇乜甩漏。對於學友錄片鼓勵，泳兒好開心咁話：「佢係地位好高嘅歌神，佢畀鼓勵同支持我，我睇完段片之後覺得自己表現好咗，好似打咗支強心針。」
