美元貶值，刺激金價狂升，今年3月每盎斯金價曾一度升穿1000蚊美金，最受惠當然係金行啦，公司生意好，高層嘅人工、花紅同佣金都和味啲。以港姐楊寶玲sell客嘅六福（590）噚日出年報，08年度大賺3億幾銀，比前一年多59%，董事局總薪酬亦有兩成三升幅，達3081萬銀，佔盈利近一成（見表），當中單係CEO黃偉常就有2276萬薪酬，人工上升23%，其佔董事局總薪酬約七成，佢嘅薪酬仲係其餘4隻金行股中，𢭃得最多人工嘅高層㖭，認真犀利。
不過華華睇番5隻金行股中，論董事局薪酬總開支佔盈利比重最高嘅唔係六福，而係謝瑞麟（417），08年度佢嘅盈利有9924萬銀，較上個年度增長八成，雖然謝瑞麟董事局薪酬總支出較上年減少約5%，但董事局開支仍佔盈利比重高達18%。喺謝瑞麟中𢭃得最高人工嘅唔係CEO黃岳永，而係被判咗罪嘅謝瑞麟囝囝謝達峰，𢭃咗700幾萬銀，佔咗董事總薪酬四成。
周生生董事薪酬支出低
講到最賺錢嘅金行股係周生生（116），盈利有5億幾銀，增長七成多，雖然公司賺咁多，董事總薪酬佔盈利嘅比重唔夠2%，班董事加埋只係攞977萬銀，較上年增加18%，而攞得最高人工嘅係集團總經理周永成，𢭃咗299萬銀。至於就嚟改名做金至尊嘅恒豐金（870），就賺咗3億幾銀，比前一個年度多咗兩倍六，收最高人工嘅就梗係主席林世榮，佢攞咗829萬銀，而董事總薪酬佔盈利比重5.4%。
金行股董事局薪酬佔盈利比重
謝瑞麟（417）
董事總薪酬(萬港銀)：1743.7 佔公司盈利：17.6%
六福（590）
董事總薪酬(萬港銀)：3081.2 佔公司盈利：9.8%
恒豐金（870）
董事總薪酬(萬港銀)：1637.1 佔公司盈利：5.4%
景福（280）
董事總薪酬(萬港銀)：345.3 佔公司盈利：2.3%
周生生（116）
董事總薪酬(萬港銀)：976.7 佔公司盈利：1.9%
註：以07至08年度年報計算
資料來源：各上市公司年報