股市波動，摩根士丹利換馬，呢單新聞點解喺華華地盤出現？因為大摩今次換嘅唔係手上嘅投資組合，而係真係幫佢哋搵生意嘅「人馬」。
據英國《金融時報》報道，大摩繼5月中裁員後，計劃進一步裁多4800人，不過，今次大摩裁員唔係為咗慳錢，只係趁好多大行因信貸危機裁員甚至摺埋，一街失業猛將，佢就裁咗啲一般員工，慳番10億美金，用嚟向外招攬高層，提升佢哋喺衍生產品、風險管理同坐盤交易嘅業務，增強中東同亞洲市場嘅競爭力。
聘貝爾斯登舊將
據報道，慳番嚟嗰10億美金中，有4億會用嚟支付新員工薪酬同花紅，剩低6億美金，就會喺年底前用嚟請人。聽講大摩主席JohnMack家吓已經請咗5個高層，包括法興前證券部主管LucFrancois，佢會出任大摩歐洲證券業務主管兼證券衍生產品業務全球主管，仲有俾摩通買咗嘅貝爾斯登，兩個前高層ThomasWong同EricCole都已經受聘大摩。沽咗啲舊股，趁低吸納啲優質股，呢啲嘢，貴為投資大行，大摩點會唔識。
電郵：mailto:[email protected]