數碼廣播變化真係好快，奧運殺到埋身，無綫電視前日失驚無神公佈話8月8日推出互動電視服務，透過互動機頂盒睇高清翡翠台同J2台，按遙控器可以睇到天氣、恒生指數、新聞提要、奧運獎牌榜，遲啲仲可以買嘢、投票㖭。
無綫𠵱家先講，唔少人已經買咗機頂盒，但市面唔係隻隻牌子都支援互動功能，買着支援唔到嘅真係激鬼死。影音專家Alan話，最基本要有無綫選用嘅MHEG5互動制式嘅機頂盒先支援到無綫嘅互動節目，不過，有MHEG5功能但未獲得無綫認證嘅機頂盒，又唔保證可享互動服務，「最壞情況係接收唔到，或者出嚟嘅中文字亂晒碼」。Alan話，𠵱家只有OLEVIAZMT-620FTA得到無綫認證，如果仲未買機，可以考慮呢部；要揀其他牌子，買嗰陣一定要試清楚。
已獲無綫認證
OLEVIA代理商南中國科技高級經理馬丁話到𠵱家為止，只有佢哋部機得到無綫認證，駁埋AV擴音機仲可以睇埋無綫嘅5.1環迴立體聲節目，「過去一個月內買OLEVIA機頂盒即時支援到互動服務，之前買嘅要上我哋嘅網upgrade軟件」。
自行研發土產機頂盒PixelMagic總監Nelson話，佢哋部機試過可以支援無綫嘅互動服務，用家今日可以上PixelMagic網升級互動功能就得。
逢周五刊出