美股周三升逾200點，但昨日的港股未有太大受惠，只微升幾十點，令投資者大跌眼鏡，加上A股跌勢持續，令到港股氣氛比較審慎，嘉賓指前幾日升市只是滙控（005）帶動，下星期眾藍籌出業績才是港股見真章的時候。嘉賓亦看好金價，建議投資者可以部署新出的黃金ETF作對冲。
楊：主持 楊慧玲
郭：敦沛金融投資研究部主管 郭家耀
楊：見到美元好似轉強，投資者好似捨黃金而去，金價曾跌穿900美元關口，你對金價點睇？
郭：我對金價睇得仲好過油價，我始終看淡美國經濟，同埋佢無咩條件加息，美國兩房事件都令投資者想搬番啲錢入黃金市場做對冲；其實金價相對高位唔係跌咗好多，今年股市依然波動同仲有下跌風險之下，將部份資產放入黃金市場，係穩陣嘅做法。𠵱家買黃金仲多咗黃金ETF（2840）呢個選擇，佢今日成交都唔錯，有好多散戶入市；金礦股雖然會跟金價走，但係亦會受股市影響，如果單純睇好股市，又唔想受股市影響的話，黃金ETF都係一個唔錯嘅選擇。
EMAIL解答：太平洋網絡應該沽出
MrFung：我IPO抽到太平洋網絡（543），佢股價升高過招股價嘅時候，意外地放唔到，之後就跌穿招股價，想問，佢公司不斷有回購股份，可唔可以令佢炒返上招股價？
郭：我睇唔到佢有盈利可以特別增長，我覺得如果佢反彈上1.9元左右不如止蝕咗先；而回購方面，未必反映管理層對公司特別有信心，所以唔好只係睇回購，佢上市無幾耐亦發過盈警，所以應該沽咗佢，再買市面上比較低價同優質嘅股份。
搶先貼股：中移動100蚊樓下加多注
梁小姐：我喺5月尾以125蚊買咗中國移動（941），佢有無機會上番125蚊？長揸可唔可以？定等佢上番110蚊放咗佢，等低啲先再入？
郭：大巿短期內應該唔會太理想，所以中移動股價冇咁快可以上番120蚊樓上。但係我覺得佢前景幾理想，因為頭6個月上客人數都幾理想，每月都穩定有超過7百萬人。大家最擔心係佢有不對稱嘅監管，但見到國家近期好積極推動CDMA，所以對中移動未來推動3G業務係幾唔錯嘅幫助。落到嚟105蚊，唔使咁快話止蝕。反而如果大巿再跌，中移動被拖到100蚊樓下，而你又有資金，仲可以加注。因為佢盈利增長暫時睇唔到有太大問題，同埋巿場已經計入咗重組消息對佢股價嘅負面影響，作為長線投資，只要公司盈利無問題，就唔好成日捉呢啲短期上落嘞。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
今日嘉賓：
