奧運足球四角賽周三在香港大球場揭開戰幔，4支參賽球隊雖盡遣馬卡爾、桑治、沙洛文卡勞及麥比廸等星級球員上陣，但兩場賽事科特廸瓦對美國、荷蘭對喀麥隆只產生兩個入球；有球迷更「悶」到瞓着及提早離場。牽牛
首天賽事吸引6,039名球迷入場，壓軸戰荷蘭對喀麥隆，現場所見甚多球迷穿上荷蘭的橙衫，聲勢遠比其他3支球隊的球迷浩大。為增加球賽可觀性，賽會模仿阿積士四角賽，除了勝方有3分、和波各得1分外，球隊每入1球也獲得1分，兩個比賽日總分最高球隊成為冠軍。
賴恩巴布入替見功架
不過，在京奧前夕，4隊尤其星級球員，比賽都未見真章；荷蘭面對00年奧運金牌得主喀麥隆，派出一對「超齡」前鋒馬卡爾及施邦掛帥，德倫特及約拿芬廸根斯文左右翼支援，上半場攻勢較「入肉」；26分鐘，中場巴卡爾乘對手門將美亞比出迎失準，右路窄位射空門，可惜斜出；31分鐘荷蘭中場馬杜路重炮遠射，美亞比擋出不遠，馬卡爾欲補中又越位在先。
喀麥隆中前場欠缺重心，誤傳甚多，苦戰至45分鐘才有具威脅埋門，可惜前鋒比卡曼基單刀施射被荷蘭門將韋夫辛救出。換邊後荷蘭換入利物浦前鋒賴恩巴布，戰至85分鐘接應馬卡爾妙傳，單刀射入；補時階段賴恩巴布投桃報李，妙傳馬卡爾近射得手，以2:0擊敗喀軍。但在此之前比賽較為沉悶，在比賽途中，球場大電視一度播出有女球迷瞓着，而比賽尚餘10分鐘，已有觀眾「走寶」離場。
科特廸瓦悶和美國
另外，四角賽頭場賽事，科特廸瓦面對美國，雙方均派遣主力出戰；科軍有車路士前鋒沙洛文卡勞歸隊，美國亦有麥比廸、艾度等球員正選披甲；來自非洲的科特廸瓦，明顯較美國適應香港悶熱天氣，全場壓住美國狂攻，可幸美國門將巴特古辛力挽狂瀾，雙方踢成0:0。科軍隊長謝雲奴賽後說：「我們的防守較上仗不敵南韓有改善，沙洛文卡勞歸隊，亦加強進攻變化。」
荷蘭贏波後，以5分居榜首，科特廸瓦及美國各得1分，喀麥隆以0分包尾；四角賽周六在香港大球場進行次天賽事，頭場由喀麥隆對美國，尾場由科特廸瓦對荷蘭。
花絮：保安多過觀眾
參賽球隊因為有美國關係，大球場保安要升至最高級別，但喺入場觀眾唔多嘅情況下，就好似變咗妹仔大過主人咁，保安多過觀眾，好似入場咁，就有3個保安幫1個球迷檢查，厲害。
卓卓捧同鄉場
已入籍香港嘅卓卓，噚日專登入場捧喀麥隆場。無他嘅，卓卓2000年都入選過喀麥隆奧運隊，雖然只係打過外圍賽，但同教練都有幾句。不過，喀麥隆當年喺悉尼最終攞金牌，偏偏卓卓落選冇打決賽周，今次見番班舊鄉里，唔知會唔會勾起傷心事呢？
記者室「豈有此理」
廣告都有話，上網上得慢簡真豈有此理，大球場記者室噚日發生段小插曲，無論無線或有線，所有上網設備全部停頓，最後要臨時搶修，但搞咗粒幾鐘都唔得。香港自稱國際都會，仲話搞奧運馬術，今次四角賽失威，唔知會唔會俾班「老外」笑到面黃。
橙軍人人玩DV
每個國家都有自己文化，荷蘭足球出名全能之外，原來玩DV係呢支橙軍新興玩意，好似賴恩巴布之前第1日到港，已經開始攞部DV周圍拍，事隔兩日，噚日大球場就已經至少有5名球員攞住部DV，影音呢家嘢真係會傳染㗎！
