選舉令人關心社會，也可令家庭和諧。曾自爆「幾乎有」外遇嘅田二少修心養性，噚日交表參選時獲太太同兩個囡囡撐場，田二少奶為老公度腰圍，有34吋，佢話睇吓選舉後田二少會否收身。田二少又話競選口號「敢言實幹為社群」係太太靈感到傑作，助選團度咗30幾句都唔夠呢句精警。田二少咁愛妻，各位太太係咪都想叫老公參選呢！
陳太叫毛孟靜補身
出選九龍西嘅公民黨毛孟靜唔使刻意上演《家好月圓》，噚日搵陳太撐場。陳太檳城度假歸來，神采飛揚。
陳太見到毛孟靜好驚訝咁話乜得咁瘦，叫佢食多啲嘢補身，事關女人唔補好易老，陳太養顏妙方係燕窩燉麥皮，常食對皮膚有益。