今年1月，蔡少芬（Ada）與在港寂寂無聞的內地演員張晉結婚，不少人都感到詫異，更不時比較他們的搵錢能力和知名度。雖然這對夫婦被外界看做「女強男弱」，張晉對此卻充滿自信，早前接受訪問時更大談跟Ada經歷過的感情波折，原來他們以前經常吵架，及後透過互相提醒和祈禱，令感情有增無減。
自與蔡少芬結婚後，被盛讚為「極品」的張晉人氣急升，不過外間流言四起，先有指張晉是窮武師，又指夫婦聚少離多，又謂兩人的知名度相差太遠。張晉日前接受訪問時表示Ada比他早成名，知名度較他高是理所當然，他還大讚老婆說：「佢好好，識得點樣令我冇呢啲壓力。至於搵錢嘛，我相信婚姻裏面，錢唔係最重要，關係先係最重要。」
接受心理輔導
張晉和Ada經常如連體嬰般晒恩愛，原來他們拍拖初期也經常爭吵，張晉說：「其實幾年前，我脾氣都唔係咁好，Ada又冇安全感，覺得我哋成日要分開，可能隨時會分手，所以經常唔開心，我哋周不時嗌交。」結果兩人一起見輔導員尋求解決方法，學會一爭吵就立刻祈禱，將事情交託給神，輔導員又比喻夫婦爭執就像走向懸崖般危險，張晉說：「我哋夫妻間有時都會遇到唔開心，我會講一句『咦，就嚟到懸崖喇』當講笑，也當做互相提醒。」
現在夫妻倆會以宗教信仰維繫感情，原來Ada當初向張晉傳福音時，他完全不信，更笑言覺得Ada「shortshort哋」，為追求Ada，才陪伴她返教會。最初張晉毫無感覺，是一次看宗教電影令他深受感動，繼而慢慢信教。張晉早前也接拍了福音電影《流浪漢世界盃》，為傳道出力。
歷地震惜家人
張晉又表示愛一個人需要把對方的缺點縮小，把優點放大，他大讚Ada為人夠真，他說：「個個朋友都好鍾意佢，我都好欣賞佢做戲咁叻。」張晉更笑謂Ada欣賞他「識好多嘢」，他說：「例如我識剪片配樂，我哋自己去旅行拍嘅片，我都可以剪得好精采。」
數月前，四川發生大地震，本身是四川人的張晉說：「經過今次災難，我更加發現喺我人生之中，最重要嘅唔係工作、唔係賺錢，係屋企人同太太。」
撰文：林妃