昨日港股因美股造好而反彈逾400點，但美資大行美林配股集資方案，令美股後市增添變數；嘉賓指昨日升市，是因為有一些對冲基金借限制沽空措施的消息買入金融股，從而推高大市，主持卻認為，對金融股仍要抱觀望態度。
碩：亨達集團研究部董事黃敏碩
孫：主持孫柏文
孫：今日（即周三）成交量都仲係好弱，恒指裂口高開之後都只係橫行。
碩：港股其實受美股帶動，道指裂口高開有幾個原因，第一係油價下跌；第二係美國限制沽空期限到期，最後結果係繼續延長，眾望所歸，有得留低，令到巿場憂慮減少。另外美林配股集資，拯救資不抵債嘅事件，有巿場人士解讀成美林肯勇敢地面對問題。
孫：美國銀行𠵱家就成日公佈業績之後盈警，接着又再集資，已經維持咗三、四季。今次有人話美林壞消息已經終極，我就叫大家放長雙眼睇係唔係喇。
碩：有好多對冲基金都借住限制沽空措施消息，就買番好似有保護嘅金融股，推番高咗大市。另外油價走勢弱，都令投資者沽空期油買入金融股，令到巿場有兩極化嘅情況出現。
搶先貼股
美聯冇大升條件
陳先生：我今日（即周三）4.21蚊買咗隻美聯物業（1200），諗住上到4.8蚊賺少少離場。
碩：呢幾個月啲地產代理都已經叫苦連天，上個禮拜先有地產代理裁員。如果憧憬繼續減息，不如炒地產股。買美聯唔係睇個樓價，而係睇個樓市交投量，樓巿要交投暢旺先可以升到。就算內地政策轉好，令巿道轉好，呢隻股都唔一定升；你睇番之前大巿反彈，佢反彈幅度都係少，暫時睇唔到咩嘢因素令佢升。其實博4.8蚊都合理，但上到4.8蚊一定要識走人。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股